Tünevin Rusiyeniñ Cenübiy bölgesiniñ arbiy mahkemesinde üçünci Bağçasaray «Hizb ut-Tahrir davası» boyunca 15-nci mahkme oturışı olıp keçti, dep haber ete «Qırım birdemligi».
Qayd olunğanı kibi, diñlevler sırasında mahkemelengenlerde keçirilgen tintüvlerde iştirak etken eki şaat sorğuğa çekilgen. Ekisi de quvetçilerniñ areketleriniñ doğru ve tertipli olğanını attılar. Mudafaa tarafı şifaiy ifade ile eki şaitniñ evel protokolda qayd etkenleri arasında ziddiyetler aşkâr ettiler.
Birinci şaat Alim Zekil edebiyatnıñ operativciler tarafından tapılıp-tapılmağanı ya da tintüvni keçirgen onı özü bergenine qarar berip olamadı ve birden eki variantta toqtadı. Ekinci şaat, Aqmescitten pensioner, tahqiqat areketlerine kendi kirişmesini «vatandaşlıq borcu köstermesi» kibi añlattı.
Soñunda prokuror Seytumer Seytumerovnıñ evinde keçirilgen tintüvniñ protokolını ilân etti, mudafaa ise itirazlarını bildirdi. Mahkeme iyünniñ 16-nace teneffüs ilân etti.
«Memorial» aq qorçalayıcı merkezi Rusiyede «Hizb ut-Tahrir davası» boyunca mahkemelengen dört Qırımlını siyasiy mabüs dep tanıdı.
Merkezniñ saytında haber etilgenine köre, söz, Seytumer Şükriyeviç, Osman Seytumerov, Amet Suleymanov ve Rustem Suytumerov aqqında kete. Bu, üçünci Bağçasaray «Hizb ut-Tahrir davasınıñ» mabüsleri.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
