Rostov-na-Donu şeeriniñ Cenübiy okrugınıñ arbiy mahkemesi noyabrniñ 12-nde Qarasuvbazardaki «Hizb ut-Tahrir davası» mabüsleriniñ sıñırlav tedbirini uzatuv qararına qarşı berilgen istinaf şikâyetini red etti, olar 2021 senesi yanvarniñ 15-ne qadar apiste qalacaq. Bu aqta «Qırım birdemligine» advokat Aleksandr Stasük haber etti.
«Qarar qanunsız olğanına dair bütün delillerni berdik, müvekkillerimizniñ bu cinayetlernen alâqasını isbatlaycaq deliller ilk tahqiqat organları tarafından berilmedi. Prokurornıñ muracaatta qayd etken delilleri sahte ve sebepsizdir. Şunıñ içün Cenübiy okrugınıñ arbiy mahkemesi bularnı körer dep tüşündik: prokuror müsbet tasvirley ve birden uzatmağa rica ete. Bugün (noyabrniñ 12-nde – QA) istinaf qurulışı Cenübiy okrugı arbiy mahkemesiniñ qararına qol tutıp, onı deñiştirmedi. Müvekkillerimizniñ sıñırlav tedbiri 2021 senesi yanvarniñ 15-ne qadar, üç ayğa uzatıldı, demek», – dedi advokat.
Diger advokat Safiye Şabanovanıñ aytqanına köre, mahkeme Qarasuvbazardaki «Hizb ut-Tahrir davasınıñ» mabüslerinden biri Ayder Cepparovnıñ davada halqara normalarnı qullanuv muracaatını qabul etti.
«Bugün (noyabrniñ 12-nde – QA) müvekkillerimiz uzun-uzun çıqışlar yaptı, hususan Cepparov Ayder. Olarğa nisbeten halqara uquq normalarınıñ qullanmasını rica etti. Ve mahkeme bizni şaşırtıp, muracaatını qanaatlendirdi, qarar çıqarğanda halqara uquq normalarına da riayet etecekler, dedi», – dedi Şabanova.
Daa evel berilgen malümatqa köre, oktâbrniñ 12-nde Qarasuvbazardaki «Hizb ut-Tahrir dava» mabüsleriniñ apis müddetini üç ayğa uzattı.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov veEskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
