Soçi şeeriniñ Üçünci istinaf mahkemesi iyülniñ 23-nde Rusiye kontrolindeki Qırım Yuqarı mahkemesiniñ cemaat jurnalisti Osman Arifmemetovnı apiste tutuv müddetini uzatmaq qararını lâğu etip, davanı yañı baquvğa yolladı.
Bu aqta advokat Aleksey Ladin «Qırım birdemligine» bildirdi. İmayeci ve müvekkili oturışuvda Aqmescit SİZOsından videokonferentsiya bağı vastasınen iştirak etti.
«Tahqiqatçınıñ muracaatınen apiste tutuv müddeti uzatılğanda Osman ve men Qırım Yuqarı mahkemesiniñ qadılarını çetleştirmege rica etsek de, qulaq asılmağan edi, olarnı mesleat odasında da, umumen de çezmeji. Bundan ğayrı, Osmannı qoruv aqqı bozuldı, mahkeme dava malümatlarını ögrenmege imkân bermedi. Bu sebepten birinci instantsiya mahkemesiniñ apiste tutuv müddetini uzatmaq qararı lâğu etildi, dep tahmin etem. Qarar azır olğanda bunı eminliknen aytmağa mümkün olur, üç kün içinde onı elde etecekmiz», – dep ayttı Ladin.
Lâkin avgustnıñ 23-ne qadar Osman Arifmemetov nezaret altında qalacaq. Advokat, istinaf mahkemesi birinci instantsiya mahkemesiniñ qararını lâğu etip, apiste tutuv müddetlerini belgilememeli edi, dep ayta.
«Mahkeme teşebbüsinen tutuv müddetiniñ uzatılması, çoqqa olmasa da, mahkemeniñ oña ait olmağan vazifelernen oğraşqanını köstere, çünki mahkeme mustaqil olmalı», – dep ayttı imayeci.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
