Rusiyeniñ Doquzıncı Akemlik Mahkemesi "Krımenergonıñ" ATR telekanalınıñ baş müdiri Lenur İslâmovğa qarşı 1 milliard rubleden ziyade dava talabını qanaatlendirdi. Bunıñ aqqında akemlik davaları kartotekasında yayınlanğan mahkeme qararında yazıla.
"QC Devlet unitar müessisesi "Krımenergo" 1 096 098 160 ruble 99 kapik miqdarında talabı esaslı esap etilsin ve borclunıñ kreditorlarınıñ talapları reyestrine kirsetilgen kreditorlarğa esaplamadan soñ qalğan mülkniñ esabına temin etilsin. Qarar qabul etilgen künden quvetini ala ve azırlanğan künden bir ay içinde Moskva rayon akemlik mahkemesinde tam şekilde şikâyet etile bilir", - dep yazıla vesiqanıñ metninde.
Advokat Nikolay Polozovnıñ Qırım.Aqiqatqa bildirgenine köre, ne Lenur İslâmovnı, ne de onıñ advokatını Qırımda akemlik mahkemesi keçirilecegi aqqında kimse haberdar etmegen.
"Bu esnas aqqında Lenur İslâmovğa kimse haber etmedi. Bundan evel, daa üküm çıqarılmazdan evel, İslâmovnıñ Rusiye yurisdiktsiyasındaki bütün falleri ekspropriatsiya etilgen edi. Özü ise müflis ilân etilgen edi. Mülkten bir şey tapmazdlar, dep tüşünem", - dep yazdı Polozov.
2020 senesi dekabrniñ 10-nda Qırım Yuqarı mahkemesi İslâmovnı 19 yıl sert rejimli koloniyada qalmasına ğıyabiy şekilde üküm etti. O, qabaatlavnıñ bütün noqtalarına istinaden qabaatlı tanıldı – «diversiyalarnı teşkil etüv, qanunsız silâlı birleşmeni quruv ve Rusiye topraq bütünliginiñ bozuluvına çağıruv». Qadılar, ükümde İslâmovnıñ kütleviy haber vastalarınıñ faaliyetinde 2 yıl iştirak etmesini yasaqladı ve 1 yılğa azatlığını sıñırladı.
İslâmovnıñ Qırım.Aqiqatqa bildirgenine köre, o, Avropa insan aqları mahkemesine muracaat etecek.
2021 senesi aprel ayında Soçideki Üçünci umumiy yurisdiktsiya istinaf mahkemesi ATR telekanalınıñ baş müdiri Lenur İslâmovnıñ ükmüni 19 yıldan 18 yılğa deñiştirdi.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
