Rusiyeniñ Vlasiha şeerindeki İstinaf arbiy mahkemesi dekabrniñ 29-nda Bağçasaraydaki üçünci «Hizb ut-Tahrir davasınıñ» mabüsleri Osman ve Seytumer Seytumerovlar, Rustem Seytmemetovnı apiste qaldırmağa qarar berdi. Bu aqta advokatlar Edem Semedlâyev ve Emine Avamileva «Qırım birdemligi» cemaat birleşmesine bildirdi.
Qırımlılar 2021 senesi Aprelniñ 22-ne qadar Rusiye SİZOsında qalacaq.
«İstinaf şikâyeti baqılğanda biz adet üzre müvekkillerimizniñ siyasiy mabüs olğanını ve diniy sebeplerden taqip etilgenini qayd ettik, Rusiye Federatsiyası halqara vesiqalarnı, hususan dördünci Jeneva şartnamesini tasdıqlağanını qayd ettik», – dedi Emine Avamileva.
İmayecilerniñ mahkemege bildirgenine köre, apiske alınğan qırımtatar faalleriniñ hronik hastalıqları bar. Emine Avamilevanıñ aytqanına köre, müvekkiliniñ sağlıq vaziyeti tahqiqat izolâtorında tutulması içün mania ola ve qanun başqa sıñırlav tedbirlerini teklif ete.
Amma mahkeme imaye muracaatını kene de qabul etmedi.
«Seytumer Qırımdan Rostov-na-Donuğa çıqarılğanını 1944 senesiniñ sürgünliginen qıyasladı, qartana-qartbabalarımız vagonlarğa ve maşinalarğa mindirilip, Qırımdan çıqarılğan edi. Qartana ve qartbabalar çekken acı ve azaplarnı o da kördi, dep ayttı. Bugün, XXI asırda qırımtatarlar aman-aman aynısını köre, balalar gruppalarnen Qırımdan koloniya ve tahqiqat izolâtorlarına çıqarıla», – dep bildirdi Seytumer Seytumerovnıñ aytqanlarını advokat Edem Semedlâyev.
Daa evel bildirilgenine köre, Osman Seytumerov Qırımdan Rusiyege çıqarılğanda hastalandı, SİZOda onı paratsetamolnen tedaviyleyler.
2020 senesi noyabrniñ 5-nde Cenübiy okrugınıñ arbiy mahkemesinde Bağçasaraydaki üçünci «Hizb ut-Tahrir davası» boyunca ilk diñlevler oldı, noyabrniñ 19-na ise davanıñ temelden baqılması planlaştırılğan edi. Faqat mahkeme mabüsler ketirilmegeni içün onı başqa künge qaldırdı.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
