Rusiyeniñ Rostov-na-Donu şeerindeki Şimaliy-Kavkaz okrugınıñ arbiy mahkemesi Aqmescit SİZOsında tutulğan «Hizb ut-Tahrir davasınıñ» mabüsi Enver Seytosmanovnıñ apis müddetini altı ayğa uzattı. O, dekabrniñ 20-ne qadar apiste qalacaq. Bu aqta advokat Sergey Legostov Qırım.Aqiqat mühbirine bildirdi.
Eñ yaqın vaqıtta Seytosmanovnı dava temelini baqmaq içün Rostov-na-Donuğa avuştıracaqlar.
«Mahkeme dava baqılmasını iyülniñ 10-na belgilep, onı Aqmescit SİZOsından Rostov-na-Donuğa avuştırmağa qarar aldı. Amma oturışuv 100% olmaycaqtır, çünki onı avuştırıp yetiştiremezler. O, selâm ayta ve kösterilgen destek içün teşekkürler bildire», — dep tarif etti advokat.
Legostovnıñ aytqanına köre, tahqiqat müvekkiliniñ qabaatlavını sertleştirdi: «Hizb ut-Tahrir» bölüginde iştirak etüvden teşkil etüvge. Onıñ bildirgenine köre, Seytosmanovnıñ davasında bir gizli şaat olacaq, qabaatlanğan kişi onı «Hizb ut-Tahrirde» iştirak etmege çağırğan ve onıñnen subetler keçirgen edi.
Ağa-qardaş Ernes ve Enver Seytosmanovlarnı Rusiye quvetçileri 2018 senesi mayısnıñ 10-nda Aqyarnıñ Balıqlava rayonındaki Hayto (Tılovoye) köyünde tintüvlerden soñ tutıp aldı.
Ernes soñra yiberildi. Enverge cinaiy dava açılğanına dair qarar berildi. Ertesi künü Rusiye kontrolindeki Aqyarnıñ Lenin rayon mahkemesi Enver Seytosmanovnı apiske aldı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
