Rusiyeniñ Rostov-na-Donudaki Cenübiy okrugınıñ arbiy mahkemesi daa bir Qırımdaki «Hizb ut-Tahrir davasını» baqıp başladı. Noyabrniñ 5-nde azırlıq oturışuvı oldı.
«Qırım birdemligi» cemaat birleşmesi bildirgenine köre, qabaatlanğanlarnıñ üçü – Rustem Seytmemetov, ağa-qardaş Osman ve Seytumer Seytumerovlar Aqmescitniñ tahqiqat izolâtorında buluna. Dördünci mabüs Amet Suleymanov ev apsinde buluna. Advokatlar oturışuvda Rusiye kontrolindeki Qırım garnizon arbiy mahkemesinden ve SİZOdan videokonferentsiya bağı vastasınen iştirak etti.
İlk diñlevlerde bir sıra teşkiliy meseleler baqıldı, faqat mabüslerge diñlevlerniñ saatı haber etilmegeni içün oturışuv noyabrniñ 6-na saba saat 10-ğa qaldırıldı. Bu aqta advokat Lilâ Gemeci bildirdi.
«Bugün mahkeme oturışuvına qoşmağan istegen bütün vesiqaları kameralarda qaldı. Bugün ne yapa bildik? Bir sıra çetleştirüv ve muracaat berildi. İlk evelâ, mahkeme erkânı, kâtip ve prokurornı çetleştirmege talap ettik. Sebebi – Qırımda halqara uquq normalarına köre 4-ünci Jeneva şartnamesi qullanılmalı. Bu talap qabul etilmedi», – dedi advokat.
Diñlevlerde diger muracaatlar da berildi, hususan qabaatlanğan Amet Suleymanovnıñ sağlıq vaziyetine dair vesiqalarnıñ ilâve etilmesinen bağlı. Mahkeme oturışuvlarına onı Cezalarnı yerine ketirüv federal hızmetiniñ hadimi iş maşinasınen ketire.
Mahkeme bu muracaatnı qabul etti. Mabüs tayin etilgen imayecilerni çetleştirmege rica etti, çünki er bir qırımtatar faaliyeniñ añlaşqan imayecisi bar. Mahkeme tayin etken advokatlar da bu muracaatqa qol tuttı.
Martnıñ 11-nde Rusiye FSB hadimleriniñ teşebbüsinen qırımtatarlarnıñ evlerinde bir sıra tahqiqat tedbiri keçirildi. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler.
Tutulğanlar Rusiye Ceza kodeksirniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv) qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
