Vlasiha şeeriniñ Arbiy istinaf mahkemesi (Moskva vilâyeti) mayısnıñ 14-nde bıltır oktâbr ayında terror faaliyetine açıq çağırğanında qabaatlanıp, eki buçuq yıl yaşav tarzı koloniyasında qalmasına mahküm etilgen qırımlı bloger, cemaat jurnalisti Nariman Memedeminovnıñ ükmünen bağlı istinaf şikâyetini baqacaq.
Bu aqta advokat Edem Semedlâyev Qırım.Aqiqat mühbirine tarif etti.
«Üküm istinafını koronavirus qırğınlığı vaziyetinden sebep video konferentsiya bağı vastasınen muzakere etecekmiz: advokatlar Aqmescitteki Qırım garnizon arbiy mahkemesinde, Nariman Rostov-na-Donu №1 SİZOsında, qadı ise Vlasiha şeerindeki Arbiy istinaf mahkemesinde olacaq», – dep tarif etti advokat.
Semedlâyevniñ qayd etkenine köre, istinaf mahkemesiniñ aqlayıcı ükmüne ümüt ete.
«Elbette, özümizni ve Narimannı mahkeme birinci instantsiya ükmüni lâğu etip, aqlayıcı qarar çıqarır, dep işandıramız, çünki areketlerinde cinayet olmağanını tüşünemiz. Menfiy amelimiz de bar: yaqında olğan bir örnek – Enver Seytosmanovnıñ davası boyunca istinaf, mahkeme birinci instantsiyanıñ qabaatlayıcı ükmüni deñiştirmedi. Amma kene de ümüt etemiz», – dedi advokat.
Edem Semedlâyevniñ Qırım.Aqiqatqa izaat berip, Rusiye mahkemesi müvekkiliniñ ükmünen bağlı istinafnıñ baqıluvını aselet soza, dep tahmin etkenini bildirdi.
Rusiyeniñ Rostov-na-Donu Cenübiy arbiy okrugınıñ mahkemesi keçken seneniñ oktâbr ayında terrorizmge açıq şekilde çağırğanında qabaatlanğan Memedeminovnıñ ükmüni çıqardı. Mahkeme Memedeminovnı 2 yıl ve 6 ay yaşav tarzı koloniyasında qalmasına üküm etildi.
Nariman Memedeminov – qırımtatar blogeri, vatandaş jurnalisti. Rusiye quvetçileri onı 2018 senesi martnıñ soñunda tutıp aldı. Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatladılar.
Rusiye quvetçilerini Memedeminovnıñ 2013 senesinden 2015 senesine qadar alıp barğan YouTubedaki videoblogu açuvlandırdı. Anda siyasiy adise-vaqialarnıñ izaatları ve islâm normalarına riayet etmek çağıruvları, Rusiye devlet bayramları – Vatan imayecisi künü, Dünya qadınlar künü, Bala künü ve digerleri – aqqında fikirler mevcut.
2018 senesi martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
