Rusiyeniñ Cenübiy arbiy bölgesiniñ mahkemesi Rostov-na-Donudaki SİZO-da tutulğan üçünci Bağçasaray «Hizb ut-Tahrir davası» mabüsleriniñ tevqif müddetini üç ayğa devam etti.
Bunı «Qırım birdemligi» cemaat birleşmesi haber etti.
Faallerniñ malümatına köre, advokat Nazim Şeyhmamabetov qayd etti ki, mahkemelengenlerniñ ağır hastalıqları olğanına baqmadan, qabaatlav tarafı SİZO-da qalmalarında israr etmege devam ete.
«Bugün Rustem Abduramanoviç, sıcaq ava olğanda andaki ava 40-45 derece olğanını ayttı. 12 metr kvadrat bir kamerada 6 adam otura. İskence degilmi?» – «Qırım birdemligi» advokatnıñ aytqanlarından alıntı ketire.
Qadı, qarar çıqarmazdan evel mahkemelengenlerniñ sağlıq alı aqqında sorağan. Osman Seytumerov bel ağrısı ve körme qabiliyeti zayıflaşqanı aqqında aytqan, Rustem Seytmemetov ise ayaqları şişkenine aytınğan.
«15 daqqalıq teneffüsten soñ qadı mudafaa tarafınıñ delillerini körmemezlikke urıp, prokurornıñ muracaatını qanaatlendirdi ve Rustem Seytmemetov, Seytumer Seytumerov ve Osman Seytumerovnıñ tevqif müddetini uzattı», – aytıp berdiler faaller.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
