Soçideki Üçünci istinaf mahkemesi cumaaqşamı künü «diversiya azırlağanında, qanunsız silâlı birleşmeni qurğanında ve Rusiye topraq bütünligini bozmağa çağırğanında qabaatlanğan» ATR telekanalınıñ baş müdiri Lenur İslâmovnıñ ükmüni deñiştirüv qararını çıqardı.
Bu aqta Qırım.Aqiqat mühbiri haber ete.
Qadılar İslâmovnı 18 yıl sert rejimli koloniyada qalmasına ve azatlığını 1 yılğa sıñırlamağa, mahsus devlet organınıñ razılığı olmasa, yaşağan ya da bulunğan yerini deñiştirmege de yasaqladı.
Daa evel o, 19 yılğa üküm etildi.
Mahkeme, kütleviy haber vastalarınıñ faaliyetinde eki yıl iştirak etüv yasağını lâğu etti.
Advokat Nikolay Polozovnıñ Qırım.Aqiqatqa bildirgenine köre, ükümni lâğu etüv sebepleri çoq edi. Onıñ aytqanına köre, Rusiye ceza qanunlarında olğan deñişmelerge köre topraq bütünligini bozuv areketlerini yapuv çağıruvlarınen bağlı altı adise lâğu etildi.
«Rusiye qanunlarına köre, silâlı birleşme Rusiyede olmasa, cinaiy mesüliyet yalıñız iştirak etüv içün berile bile. Yani Noman Çelebicihan batalyonı Rusiyede ya da işğal altındaki Qırımda qurulmadı. Şunıñ içün Lenur İslâmovnıñ mesüliyetke çekilmesi qanunlarğa zıt kele», – dep tüşüne Polozov.
Advokatnıñ fikirince, Lenur İslâmovnı «büyük mülk zararı ile diversiyanı kerçekleştirüv» qabaatlavı isbatlanmağanı içün lâğu etilmeli.
«Bir şaat mahkemede bergen şaatlığından vazgeçti, gizli şaat ise tayanğıçlar patlatılğan kününi bile yañlış ayttı: o, noyabrniñ 20-nden 21-ne keçer gecesi ateş körgenini ayttı, patlav ise noyabrniñ 21-nden 22-ne keçer gecesi (2015 senesi – QA) oldı», – dep ayta Nikolay Polozov.
Advokat, Avropa insan aqları mahkemesine şikâyet etmege niyetlene, dep qayd etti. Lenur İslâmov Rusiye mahkemesiniñ qararını daa izaatlamadı.
Dekabrniñ 10-nda Qırım Yuqarı mahkemesi İslâmovnı 19 yıl sert rejimli koloniyada qalmasına ğıyabiy şekilde üküm etti. O, qabaatlavnıñ bütün noqtalarına istinaden qabaatlı tanıldı – «diversiyalarnı teşkil etüv, qanunsız silâlı birleşmeni quruv ve Rusiye topraq bütünliginiñ bozuluvına çağıruv». Qadılar, ükümde İslâmovnıñ kütleviy haber vastalarınıñ faaliyetinde 2 yıl iştirak etmesini yasaqladı ve 1 yılğa azatlığını sıñırladı.
İslâmovnıñ Qırım.Aqiqatqa bildirgenine köre, o, Avropa insan aqları mahkemesine muracaat etecek.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
