Rostov-na-Donu (Rusiye) Cenübiy okrugınıñ arbiy mahkemesi Aqmescitteki ekinci «Hizb ut-Tahrir davasınıñ» daa beş mabüsi Enver Ametov, Osman Arifmemetov, Yaşar Muyedinov, Ruslan Suleymanov ve Rustem Şeyhaliyevniñ apis cezasını sentâbrniñ 20-ne qadar uzattı. Bu aqta «Qırım birdemligi» cemaat birleşmesi Qırım.Aqiqatqa bildirdi.
Birleşme, Rusiye prokurorı Konstantin Firsov qırımtatar faalleriniñ apiste qaluv müddetini üç ayğa uzatmağa rica etti, dep bildirdi. O, eski sebepler qala, mabüsler ise «cinaiy faaliyetnen oğraşa» ya da esas Ukrainağa kete bile, çünki qırımlı mabüslerniñ Ukraina vatandaşlığı bar, dep qayd etti.
Faallerniñ aytqanına köre, advokat Lilâ Gemeci sözge çıqıp, imaye qabaatlav muracaatına qarşı itiraz bildire, çünki o, sebepsiz ola, qaçuv ya da mahkeme tahqiqatına mania ihtimalinen bağlı laflar ise isbatlanmadı, dep qayd etti.
Onıñ aytqanına köre, mabüslerniñ bütün içtimaiy bağları ev, iş, qorantaları olğan işğal altındaki Qırımnen bağlı. Gemeci ve daa bir imayeci, Refat Yunus, azatlıqtan marum etüvnen bağlı olmağan sıñırlav tedbirini belgilemege rica etti.
Yunusnıñ qayd etkenine köre, Yuqarı şura qararına köre, er seferinde yañı sebepler kösterilmeli. Onıñ aytqanına köre, bugünki künde tedqiq etilgen deliller mabüslerniñ qabaatını köstermey.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
