Rusiyeniñ Rostov-na-Donu Cenübiy okrugınıñ arbiy mahkemesi Aluştadaki «Hizb ut-Tahrir davası» mabüsleriniñ sıñırlav tedbirini üç ayğa uzattı.
Bu aqta cumaaqşamı künü, aprelniñ 8-nde, advokatlar Ayder Azamatov, Siyar Paniç ve Refat Yunus bildirgenler, dep qayd etti «Qırım birdemligi» cemaat birleşmesi.
«Devlet qabaatlayıcısı mabüslerniñ sıñırlav tedbirini üç ayğa uzatmağa rica etip, «cinayetleri ağır ve mahkemeden saqlanmağa imkânları bar», dep ayttı. İmaye, daa yımşaq bir sıñırlav tedbiri olmasında israr etti, amma mahkeme kollegiyası bütün muracaatlarnı red etti», – dep aytıla haberde.
Advokat Ayder Azamatovnıñ aytqanına köre, mahkeme oturışuvında o, mabüslerniñ cinayet yapqanı bir vaqıt qayd etilmegenini bildirdi. Bundan ğayrı, onıñ aytqanına köre, saqlana bileceklerini isbatlağan deliller de yoq.
«O, sıñırlav tedbirini yımşatıp, muracaatnı red etmege teklif etti. Advokat Siyar Paniç zenaatdaşınen razı. O, mabüsler mahkemege tesir etip olamaz ve ceza ağırlığı sıñırlav tedbirini belgilemegeninden emin. Tayin etilgen advokatlar video konferentsiya vastasınen söz alğan zenaatdaşlarınıñ fikirlerine qol tutıp, müsbet hasiyetnamelerini ve balaları olğanını qoştı», – dep aytıla haberde.
Aluştadaki «Hizb ut-Tahrir davasınıñ» mabüsi Ruslan Nagayevniñ aytqanına köre, eki yıl devamında mahkemeniñ mabüsler bir cinayet yapmaycağını ve olarnı SİZOda tutmağa acet olmağanını añlamaq içün yeterli qadar vaqtı bar edi.
Daa evel berilgen malümatqa köre, Aluştadaki «Hizb ut-Tahrir davası» boyunca keçken mahkeme oturışuvında prokuratura delillerni tedqiq etip bitirdi.
Daa evel belli olğanına köre, Aluştadaki «Hizb ut-Tahrir davasınıñ» üç mabüsi Lenur Halilov, Eldar Kantimirov ve Ruslan Nagayev Rusiyeniñ Rostov-na-Donudaki SİZO-1-den SİZO-5-ke avuştırıldı.
Aluştadaki «Hizb ut-Tahrir davasınıñ» mahkemesinde qadı hastalanğanı içün uzun teneffüs ilân etilgen edi. Dava baqıluvı 2020 senesi dekabrniñ 22-nde yañıdan başladı.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir davası»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
