Rusiye Federatsiyasınıñ Baş prokuraturası "Almenda" sivil maarif merkezini "istenilmegen" teşkilât olaraq tanıdı. Mütenasip malümat İlk küzniñ 23-nde peyda oldı. Qararnıñ sebepleri aqqında açıq izaat berilmedi. Merkezniñ malümatına köre, qarar 2026 senesi İlk küzniñ 9-nda qabul etildi.
"Almenda" merkezi 2011 senesi Yaltada quruldı. Başta teşkilât grajdanlıq tasilinen, insan aqları ve media doğrulığınen oğraşa edi. 2014 senesi Qırım Rusiye tarafından işğal etilgen soñ, işniñ esas yönelişi vaqtınca işğal etilgen topraqlardan balalar ve gençlerniñ Ukrayin tasil aqqını qorçalamaq oldı.
Bugün "Almenda" Rusiye Federatsiyasınıñ işğal etilgen topraqlardaki balalarnıñ askeriyleştirilüvi ve olarnıñ Ukrayin kimligine tesir etüv içün tasil alanını nasıl qullanğanını belgiley. Teşkilât bozuvlarda iştirak etkenler aqqında malümat toplay, olarnı mesüliyetke çekmek içün çalışa ve sanktsiyalarnı qullanmaq içün malümat bere.
"Almenda"da qayd eteler ki, vaqtınca işğal etilgen topraqlarda tasil nezareti Rusiyeniñ balalarğa nisbeten siyasetiniñ müim qısmı ola. Bu sebepten merkez Ukrayin tasil aqqını qorçalamağa, bozuvlarnı belgilemege ve kelecekte reintegratsiya içün çezüvlerni azırlamağa devam ete.