Onıñ malümatına köre, aerodromda Su-24, Su-24M, Su-34 cebe bombardımancıları bar edi. Rusiye olarnı Ukraнina Silâlı quvetleriniñ mevzilerine ve Ukrainanıñ cebedeki şeerlerine ava bombalarını tüşürmek içün qullana.
"Altı Rusiye arbiy uçağı yoq etildi, daa sekizi zarar kördi. Tehnikadan ğayrı, tahminen 20 arbiy raşist "eki yüzlük" ya da "üç yüzlük" oldı", – dedi jurnalistlerniñ subetdeşi.
Onıñ fikirince, mahsus ameliyat "Rusiye ordusınıñ arbiy imkânlarını bayağı eksiltecek". Daa evel Rusiyedeki yerli akimiyet aprelniñ 5-ne keçken gecesi kütleviy şekilde yapılğan uçucısız uçaq ücümleri aqqında haber etken edi.
Saba yerli telegram-kanalları Rostov vilâyetiniñ Morozovsk şeerinde uçaqnıñ taktik aviatsiya ile uçaq alanına urulğanı aqqında yazdı. Akimiyet bu malümatnı resmiy şekilde tasdıqlamay.
Morozovsk - Rusiye Federatsiyasınıñ Rostov vilâyetinde, Morozovsk şeerinden 3 km cenübiy-ğarpta yerleşken arbiy uçaq alanı. Uçaq alanında RF Ava quvetleriniñ qarışıq aviatsiya diviziyasınıñ 559-ncı gvardiya bombardirovka aviatsiya polkı yerleşe (RF Mudafaa nazirliginiñ 75 392-nci gvardiya bölügi). Uçaq alanında Su-24, Su-24M, Su-34 bombacıları yerleşe.
Rusiyeniñ Ukrayinağa tam miqyaslı istilâsı başlağan soñ, Rusiye regionlarına muntazam sürette arbiy dronlar kele, bunıñ neticesinde viraneler ve elâk olğanlar bar. Rusiye Mudafaa nazirligi, ücümler Ukrayina tarafından yapılğanını iddia ete. Kıyiv bu haberlerge izaat bermey.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
