Rusiyeniñ Ukrayinağa istilâsı başlağanından berli üç yıl içinde 20 081 rusiyeli cenkke qarşı aktsiyalar ve mitinglerde iştirak etkeni ve cenkke qarşı mevamını açıq şekilde bildirgeni içün yaqalandı. Aynı zamanda tutulğanlarnıñ çoqusı, yani 18 910 kişi, 2022 senesine rastkeldi. 2023 senesi 274 insan tutuldı, 2024 senesi ise 41 kişi. Bu statistika "OVD-Info" aq qorçalayıcı leyhasınıñ malümatına esaslana.
Qayd etilgenine köre, cenkke qarşı aktsiyalarda tutulğanlarnıñ sayısı eksilgeni Rusiye akimiyeti tarafından Rusiye ordusı aqqında yalan ve onıñ itibarını tüşürüv qanunlarınıñ qabul etilmesinen bağlı. Şimdi tutuluvlarnıñ çoqusı içtimaiy ağlardaki yazılarnen bağlı. Cenkniñ üç yılı içinde uquq qoruyıcı organları 856 kere rusiyelilerni, cenkke qarşı yazılar, timsaller ya da Ukrayinağa istilâ ile alâqalı ola bilecek diger malümatnı internette yerleştirgenleri içün yaqaladılar.
"OVD-İnfo" malümatına köre, 2024 senesi içtimaiy ağlarda cenkke qarşı çıqqanlar içün cinaiy davalarnıñ 85%-ı 2022 ya da 2023 seneleri yazılğan yazılar ve izaatlar içün açıldı.
Leyhanıñ müellifleri qayd eteler ki, 2024 senesi Rusiye akimiyeti cemaat ögünde terrorizmni aqlağan cinaiy maddeni çeşit cenkke qarşı çıqışlar içün sıq qullanmağa başladı. Cenkke qarşı çıqqanlarnı taqip etken qanunlar da kenişletildi. Şimdi Rusiyede cenkke qarşı çıqqanları içün mal-mülkten marum etile bile, devlet hainligi ve cinayet aqqında bildirmegenleri içün ceza bayağı sertleştirildi.
Rusiyeniñ Ukrayinağa keniş mıqyaslı istilâsı 2022 senesi fevralniñ 24-nde başlandı. Bu vaqıt devamında Rusiye Ukrayinanıñ Donetsk, Lugansk, Zaporijjâ ve Herson vilâyetleriniñ bir qısmını nezaret altına aldı ve olarnı ilhaq etti. Harkiv vilâyetiniñ bir qısmı da zapt etildi. Ukrayina Rusiye ordusı tarafından işğal etilgen bazı topraqlarnı qaytarıp aldı, em de Kursk vilâyetinde Rusiye territoriyasında arbiy operatsiyanı başladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
