Rusiye Baş ştabı üç balası olğan babalarnıñ Ukrayına ile cenkke seferber etilüviniñ uzatuvını lâğu etti. Bu aqta Rusiye Federatsiyası Devlet dumasınıñ qoranta, qadın ve bala komitetiniñ yolbaşçısı Nina Ostanina bildirdi. Baş ştab bu aqta resmiy beyanat yapmadı, dep haber ete Azatlıq Radiosı.
Memurnıñ aytqanına köre, bu aqta Prezidentniñ insan aqları şurasınıñ azası İrina Kirkoranen körüşkende haberi oldı. O, dekabrniñ soñunda Baş ştab mezkür qaideni 2022 senesi oktâbrniñ 4-nde lâğu etti, dep bildirdi.
Ostanina, «mahsus arbiy operatsiya (Rusiye akimiyeti Ukrayınağa qarşı cenkni böyle adlandıra – QA) alanında olğanlarnı qaytarmaq pek qıyın», dep tahmin etti. «Qısmiy seferberlikniñ bitmesi üç balası olğan babalarnı seferber etmeycekler demek», – dep yazdı Ostanina. Aynı vaqıtta seferberlik bitkenine dair buyruq yoq. Rusiye Federatsiyasında faal askerlikke aluv olması da, er kün yañıdan başlatıla bile.
Zabaykalye ülkesiniñ arbiy komissarı Yuriy Şuvalov da Çita.Ru neşirinen laf etip, seferberlikni uzatuv lâğu etilgenini ayttı. Şuvalovnıñ bildirgenine köre, oktâbrniñ 4-nde çıqqan vesiqa dekabrniñ 21-nde alınğan qararnen «bütünley lâğu etildi».
Tünevin Dağıstanda üç balalı babanıñ seferber etilüvini uzatmağa izin berilmegeni belli oldı, dep haber ete «Agora» aq qorçalayıcı gruppasınıñ reberi Pavel Çikov.
Qanunğa köre, 16 yaşını toldurmağan dört ve ziyade balası olğan erkeklerniñ seferber etilüvi uzatıla. Seferberlik başlanğan soñ Rusiye Baş ştabı üç balası olğanlarnıñ seferber etilüvini uzatmağa emir etti. Bu emirler resmiy şekilde derc etilmedi.
Rusiye mudafaa nazirligi üç balalı babalarnıñ seferber etilüvini uzatuvnıñ lâğu etilüvini daa izaatlamadı.
Rusiye Devlet dumasınıñ mudafaa komitetiniñ yolbaşçısı Andrey Kartapolov 2023 senesi baarden başlap 30 yaşına qadar insanlar Rusiye ordusına alınacaq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
