Sağlıq problemleri olğan Emir-Usein Kuku, Servet Gaziyev ve Amet Suleymanovnıñ Rusiye apishanelerinde tutuv şaraitleri ayatları içün telükeli ola. Bu aqta Ukrayına prezidentiniñ Qırım Muhtar Cumhuriyetindeki temsilciliginiñ saytında aytıla.
«İşğalciler ukrayınalı siyasiy mabüsler Emir-Usein Kuku, Servet Gaziyev ve Amet Suleymanovnı işkencege oğratmağa devam ete. Üçüniñ de ciddiy sağlıq problemleri bar, qanunsız tutuv şaraitleri ise tek vaziyetleri içün degil, ayatları içün telükeli ola», – dep aytıla haberde.
Qayd etilgenine köre, 63 yaşında Servet Gaziyev bağırsaq ağrısından ve 2021 senesi sentâbr ayında Rostov-na-Donudaki SİZO-5-te köteklengen soñ omurğa problemlerinden şikâyet ete.
Gaziyevniñ qız qardaşı aytqanına köre, ekim onı tek bir kere baqtı, yazılğan ilâc ise öyle de berilmedi.
Apiske alınmazdan evel de yürekniñ arterial ve mitral yetersizligi olğan Amet Suleymanovnıñ da alı fenalaşa. O, bütün kün ayaqta turmağa ya da tar skemlede oturmağa mecbur, ayaqları şişe.
İyülniñ soñunda Emir-Usein Kukunıñ bağırsaq ameliyatı oldı, amma tam olaraq ne yerde ameliyat oldı alâ daa belli degil. Siyasiy mabüske reabilitatsiyağa izin berilmedi. Açlıq tutmağa mecbur oldı, çünki apishane aşhanesinde aşap olamay, ameliyattan soñ kürpe aşamağa yasaqlandı.
Ukrayına prezidentiniñ Qırım Muhtar Cumhuriyetindeki temsilciligi halqara toplulıqnı cevap berip, kontroli altında olğan Qırım memuriyetinen beraber bütün halqara gumanitar uquq normalarını körmemezlikke urğan Rusiyege basqı yapmağa çağıra.
«Vaqtınca işğal etilgen Qırımda siyasiy taqip, işkence, repressiya ve qanunsız ükümler toqtamalı, cinayetler içün mesüliyetke çekilmeli, Ukrayına yarımadası bütünley işğalden azat etilgenine qadar bu imkânsız», – dep bildirdi matbuat hızmeti.
Rusiye mahkemesi mahküm etken üçüni aq qorçalayıcılar siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
