Ukrayına ile sıñırı olğan eki Rusiye vilâyetinde territorial mudafaa otrâdlarınıñ quruluvı başlandı, dep ilân etildi.
Rusiyeniñ Belgorod vilâyetiniñ valisi Vâçeslav Gladkovnıñ Telegram kanalında bildirgenine köre, sıñırdaki rayonlarda «tış ücümge qarşılıq köstermek içün» territorial mudafaa otrâdları qurula.
Onıñ aytqanına köre, şimdi akimiyet «sağlıq vaziyetinden ya da yaşından sebep silâlı quvetlerge çağırılmağan, amma cenk tecribesi olğan ve kerek olsa, evini ve qorantasını qorumağa pek istegenlerden bir qaç batalyon» şekillendire.
Gladkov bildirgenine köre, territorial mudafaa askerlerini «bir çoq yerli cenkten keçken tecribeli talimatçılar ögrete».
Noyabrniñ soñunda Belgorod vilâyetiniñ valisi Ukrayına ile sıñırda «kertik sıñırı» – tanklarğa qarşı mudafaa inşaatları sisteması qurulıp başlandı, dep ilân etti.
Samooborona otrâdınıñ quruluvı aqqında dekabrniñ 6-nda Kursk vilâyetiniñ valisi Roman Starovoyt da bildirdi.
«Bizde «Vatanperver» halq müfrezesi şekillendirile. Göñülliler ciddiy saylavdan ve arbiy azırlıqtan soñ arbiylerge regionnı qorumağa yardım etecek», – dep yazdı o, Telegram kanalında.
Rusiye ordusınıñ Ukrayınağa qarşı büyük silâlı istilâsı başlağan soñ Belgorod ve Kursk vilâyetleriniñ akimiyet vekilleri Ukrayına arbiyleri muntazam sürette mesken yerlerge ateş aça, dep bildirip başladı. Ukrayına akimiyeti bu haberlerni resmiy şekilde izaatlamay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
