Rusiye prezidenti Vladimir Putin cumaaqşamı künü milletke muracaat etti. O, tatil rejimini aprelniñ 30-na qadar uzattı, dep bildire Azatlıq Radiosı.
Rusiye prezidentiniñ aytqanına köre, tatil aftası hastalıqnen küreş içün vaqıt qazanmağa imkân berdi.
Putinniñ bildirgenine köre, şimdilik esli-başlı insanlarnı hastalıqtan qorup oldılar, amma telüke daa bar, çünki qırğınlıq zirvesi daa ileride.
Onıñ qayd etkenine köre, Moskvada qırğınlıqnı daa yeñip olamaylar. Bazı regionlardaki vaziyet daa yahşı. Putinniñ fikirince, regionlar qırğınlıq vaqtında olacaq rejimni özleri belgilemeli. Çalışacaq ve qapatılacaq müessiselernen bağlı qarar alınmalı.
Onıñ aytqanına köre, akimiyet organları çalışmağa devam ete.
«Kerek olsa – tatil künleriniñ müddetini deñiştirirmiz, belki, vaziyet eyileşir ve qısqartırmız. Ekimlerniñ ve akimiyetniñ tevsiyelerine diqqatnen yanaşmalı. Vaziyet ne qadar qıyın olğanını añlasaq, telükeni eksiltip olurmız», – dep ayttı Putin.
Rusiyede aprelniñ 2-si sabağa qadar 771 yañı koronavirus hastası qayd etildi. Hastalarnıñ sayısı 3548 oldı. Eñ çoq hasta Moskvada – 2475.
Rusiye regionlarınıñ ekseriyeti koronavirus tarqalğanı içün karantin tedbirlerini ilân etti. Faqat fevqulâde vaziyetniñ federal rejimi ilân etilmedi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
