Rusiyeniñ Yaroslavl şeerinde Boşnıñ 3-ne keçer gecesi "Slavneft-YANOS" cermay zavodı dronlarnıñ ücümine oğradı. İşhanede ücümden soñ şiddetli yanğın çıqtı. Astra nezaret kanalınıñ yazğanına köre, şaatlarnıñ fotoresimleri ve videolarında eñ azdan beş yanğın noqtası körüne.
Yaroslavl vilâyetiniñ gubernatorı Mihail Yevrayev içtimaiy ağlarda, ücüm neticesinde cermay zavodınıñ infrastrukturası zarar kördi, eki hadimi yaralandı, dep yazdı.
Onıñ aytqanına köre, urulğan dronlarnıñ "parçaları" bir qaç çoq qatlı ev ve şahsiy evlerniñ camlarını qırğan, maşnalar zarar körgen.
"Slavneft-YANOS" neft istisal zavodı Rusiyede quvetine köre beşincidir. Zavod yılda 15 million tonna cermay işley bile. Yaroslavldeki cermay zavodı defalarca Ukrayin dronları tarafından ücüm etildi.
Rusiyeniñ keñ kölemli basuvı başlağan soñ, RF territoriyasındaki çeşit obyektler ve Ukrayinanıñ işğal etilgen regionları ava ücümlerine oğray.