Rusiyede Roskomnadzor Stalin terrorınıñ qurbanları hatırasına bağışlanğan «Adlarnı qaytaruv» aktsiyalar saytı blok etildi. Bunı «Roskomsvoboda» leyhası qayd etti, dep yaza Azatlıq Radiosınıñ Rus hızmeti.
Haberge köre, «Adlarnı qaytaruv» saytı yasaqlanğanlar sırasına kirsetilgen.
Qayd etilgenine köre, blok etilüvini aytılmağan devlet organı talap etti. Adet üzre bu rol Rusiye devlet prokuraturası ait.
Moskva akimiyeti koronavirus devam ete dep, şeerde ananeviy «Adlarnı qaytaruv» tedbiriniñ keçirilmesini tasdıqlamadı. Aktsiya er yıl oktâbrniñ 29-nda keçirile, anda Sovetler Birliginde repressiyalarğa oğrağanlarnıñ adları oqula.
Sentâbr ayında Rusiye Baş prokuraturası sovet yıllarında repressiyalarğa oğrağanlarnıñ reabilitatsiyası aqqında dört biñden ziyade çıqaruvnı lâğu etti. Umumen 14 biñ hulâsa teşkerildi. Prokuratura ya alman askerleri, ya da işğal idareleri hadimleri arasında olğan repressiyağa oğrağanlarnıñ hulâsalarını lâğu ettiler, dep iddia ete.
«Adlarnı qaytaruv» aktsiyası Rusiyede 2007 senesinden başlap er yıl oktâbrniñ 29-nda ötkerile. Teşebbüsçisi «Memorial» aq qorçalayıcı merkezi ola. İnsanlar farqlı şeerlerde toplaşıp, Stalin vaqtında qurşunğa tizilgen ya da siyasiy qabaatlavlarnen GULAGda elâk olğan tanış ve tanış olmağan insanlarnıñ, tuvğanlarınıñ adlarını oquy.
Oktâbrniñ 30-nda Rusiyede resmiy şekilde Siyasiy repressiyalarnıñ qurbanlarını hatıra künü qayd etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
