Rusiye yanvarniñ 15-nde qoşma seferberlik ilân ete bile. Bu tahminni Ukrayına Mudafaa nazirliginiñ Baş istihbarat idaresiniñ vekili Andriy Çernâk t-online içün bergen izaatında ayttı. İzaatnı Ukrayına Baş istihbarat idaresiniñ matbuat hızmeti yanvarniñ 7-nde aydınlattı.
«Onıñ aytqanına köre, terrorist memleketniñ Silâlı quvetlerine yarım million qadar rusiyeli seferber etilecek. Buyruq leyhası olğan seferberlik bı sefer Moskva ve Sankt-Peterburg kibi büyük Rusiye şeerlerinde de olacaq», – dep aytıla Ukrayına Baş istihbarat idaresiniñ haberinde.
Çernâkniñ malümatına köre, seferberlik em içtimaiy saalarda, «em Rusiye iqtisadiyatına kâr ketirgen saalarda» çalışqan erkeklerge de tesir etecek.
Ukrayına Silâlı quvetleriniñ Baş ştabı yanvarniñ 5-nde Rusiye daa bir seferberlik dalğasına azırlana, dep bildirdi.
Ukrayına Mudafaa naziri Öleksiy Reznikov rusiyelilerni yaqın vaqıtta başlaması mümkün olğan yañı seferberlik dalğasından qaçmalarına çağırdı. Moskva daa bir seferberlik dalğasını keçirmek niyeti aqqında şimdilik ilân etmey.
Bıltır sentâbr ayında Rusiyede lafta qısmiy seferberlik başlandı. Rusiye Federatsiyasınıñ Mudafaa nazirligi bildirgenine köre, 300 biñ insan seferber etilecek edi, amma kütleviy haber vastaları akimiyetniñ millionğa qadar insannı seferber etmege niyeti bar, dep bildirgen edi. Şimdi seferberlik toqtatıldı, amma seferberlik buyruğı çalışmağa devam ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
