Rusiye Yuqarı mahkemesi "Sarı şerit" Ukrayin areketini ekstremist teşkilât olaraq tanıdı ve onıñ faaliyetini Rusiye territoriyasında yasaq etti (Rusiye qanunlarına köre, söz Rusiye tarafından işğal etilgen Ukrayin topraqları aqqında da kete). Bu aqta Boşnıñ 12-nde saba Rusiye kütleviy haber vastaları bildirdi.
"Mahkeme, Ukrayin mahsus hızmetleri ve dost olmağan memleketlerniñ maliyeviy desteginen faaliyet köstergen birleşmeniñ faaliyeti Rusiyeniñ topraq bütünligine zarar ketirgenini belgiledi", — dep aytıla mahkeme beyanatında. Areketniñ faalleri "cemaat yerlerinde sarı şeritler bağlağanı, Ukrayina destegine levhalar asqanı ve graffiti yapqanı, Ukrayin yırlarını icra etkeni" içün qabaatlana.
Areket öz faaliyetini 2022 senesi baarde Rusiye ordusı tarafından işğal etilgen topraqlarda köstermege başladı. Onıñ faalleri (areketniñ malümatına köre, olar bir qaç biñden ziyade) zorbalıqsız şekilde Rusiye işğaline qarşı narazılıq bildireler. Faaller Ukrayin timsalleri ile şeritler, plakatlar, graffiti ve stikerler yardımınen bu topraqlarda, şu cümleden işğal etilgen Qırımda, Ukrayinanıñ bulunuvını hatırlatalar. Faaller areketniñ ekstremist olaraq tanılmasından evel de gizli areket ete ediler. Areketniñ timsali sarı şerit oldı.
2022 senesi Boşta areket temsilcileri Saharov mukâfatına lâyıq oldılar.