Ceza kodeksiniñ maddesi kene qayd etilmey. TASS menbalarına esaslanıp yazğanına köre, Feyginge qarşı Rusiye ordusı aqqında yalan malümat tarqatqanına dair maddege istinaden cinaiy dava açıldı. Feygin İlya Ponomarev qurğan ve Rusiyede istenmegen teşkilât olaraq tanılğan «Halq deputatlarınıñ qurultayı» muhalifet teşkilâtınıñ faaliyetinde iştirak etkeninde ve Ukrayına tarafında cenkleşken «Svoboda Rossii» legionınıñ faaliyetini «muntazam sürette aydınlatqanında» qabaatlana.
«Beklenilgen bir şey, yañı bir şey yoq», –dep yazdı Feygin Telegramda. O, Rusiye tışında yaşay.
Sahte malümat maddesine köre 10 yıl apis cezası berile bile. Feygin Birinci çağırıluv Devlet dumasınıñ (1993-1995) deputatı edi, soñra advokat oldı. O, Pussy Riot gruppasını ve ukrayınalı arbiy Nadejda Savçenkonı imaye etken edi. 2018 senesi Rusiyede onıñ advokat statusı lâğu etildi. Onı «çetel agentleri» cedveline kirsetkenler.
Feygin – eki milliondan çoq abunecisi olğan YouTube kanalınıñ saibi. Ukrayınada büyük cenk başlağan soñ onıñ Ukrayına prezidentiniñ sabıq mesleatçısı Oleksiy Arestoviçnen yayınları populâr oldı. Keçenleri alıp barıcılarnıñ fikirleri bir-birine zıt kelgeni sebebinden bu yayınlar toqtatıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
