Rusiyede işğal etilgen Qırım «Rusiye» olaraq qayd etilmegen haritalar içün para cezalarınıñ kirsetilüvinen bağlı qanun leyhası keri çağırıldı, dep bildirdi yanvarniñ 21-nde Rusiye Federatsiya şurasınıñ Qırım azası Sergey Tsekov.
«İnterfaks» rus agentliginiñ malümatına köre, qanun leyhası muzakerege çıqarılğan edi.
Tsekovnıñ aytqanına köre, «bu mevzu başqa vaqıtqa qaldırılmadı». «Onıñ üzerinde çalışamız. Ne vaqıt azır olacağını aytmaq zor», – dedi Tsekov.
Bundan evel Rusiye Federatsiya şurasınıñ Qırım azası Olga Kovitidi, qanun leyhasınıñ ilk örgeni Rusiye memuriy cinayetler kodeksiniñ 19.11 maddesi «Rusiye Devlet gerbiniñ resimleri tasvir etilgen blank, müür ya da diger taşıyıcılarnıñ azırlanması, qullanması, saqlanması ve yoq etilmesi tertibiniñ bozuluvı» ola bile, dep aytqan edi. Onı bozğanlar 500 rubleden 1000 rublege qadap para cezasını almaları mümkün.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
