Rusiyeniñ Sankt-Peterburg şeerinde quvetçiler faal Ölga Smirnovanıñ evine kelip tintüv keçirdiler. O, qırımtatarlarnıñ destegine piket keçirgeni içün terrorcılıqnı aqlı köstergeninen qabaatlana (Ceza qanunnamesiniñ 205.2 maddesi). Bunı "OVD-İnfo"-ğa atfı etip "Nastoyaşçeye vremâ" haber ete.
Uquq qoruyıcılarnıñ malümatına köre, OMON hadimleri onıñ dairesiniñ qapısını sındırıp kirgenler.
Davanıñ açıluvına dair qararda, avgustnıñ 18-nde Kudrovo şeerinde keçirilgen piket kösterilgen. Bu, "Strategiya-18". teşebbüsiniñ çerçivesinde keçirilgen er aylıq piket edi. O zaman pikette Vladimir Şipitsın, Asan Mümci, İlya Tkaçenko, Tatyana Siçkareva, İlyas Eşref ve Ölga Smirnova iştirak ettiler.
Aktsiya vaqtında olarğa belli olmağa kişi ücüm etti. Bundan soñ erkek polis hadimlerini çağırdı ve faaller plakatnı tutıp beraber piket keçirgenlerini ayttı. Polis hadimleri er kesni yaqaladı. "OVD-İnfo" bergen malümatqa köre, polis bölüginde olarğa qarşı Memuriy uquq bozma maddesinden ğayrı, daa yasaq etilgen timsalâtnı (bayraqlarda Qırımtatar Milily Meclis timsalâtı) numayış etkenleri içün protokol tizileciginen tehdit etkenler. Sentâbrniñ 21-nde Vsevolojsk şeer mahkemesi davanı qapattı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
