Rusiyede soñki künde 658 yañı koronavirus hastası qayd etildi. Bu raqam bir kün evelkisinden büyüktir. Bu Rusiye operativ ştabınıñ resmiy malümatıdır, dep haber ete Azatlıq Radiosı.
Eñ çoq hasta Moskvada qayd etildi – 536, Moskva vilâyeti ekinci yerde – 45. Bir künde 14 regionda, şu cümleden Qırımda da, yañı hastalar qayd etildi. Kamçatkada ilk hasta qayd etildi.
Bir künde eki insan vefat etti, 22 kişi tüzeldi.
Böylece, Rusiyede hastalarnıñ sayısı 5 biñni aştı – resmiy malümatqa köre, 79 regionda 5389 hasta (olardan 3893-ü Moskvada) qayd etildi. Bu müddet devamında 45 insan öldi.
Bir çoq Rusiye regionında, hususan Moskvada, umumiy tecrit rejimi çalışa – akimiyet onı karantin dep adlandırmay, amma aslında laf sert karantin tedbirleri aqqında kete. Evden tek işke, eñ yaqın tükânğa, ev ayvanlarını çıqarmaq ve çöplük atmaq içün mümkün.
Rusiye prezidenti Vladimir Putin aprelniñ 30-na qadar bütün künlerni tatil dep ilân etti, faqat iş bergenlerni hadimlerge aylıq bermesine mecbur etti.
Rusiye sıñırları qapatıldı, cuma künü Rusiye vatandaşlarınıñ vatanğa qaytmaq içün kerçekleştirilgen seferler toqtatıldı. Neticede akimiyet qaytmağa istegenlerniñ cedvelini tizip, insanlarnı çıqarmağa devam etecek, dep haber etildi. Berilgen malümatqa köre, şimdilik Rusiye Tış işler nazirligi çetelde rusiyelelirniñ yerleşmesine 500 million ruble ayıracaq.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
