Estoniya parlamentiniñ bazı azaları "Memorial" aq qoruyıcı cemiyetini Nobel sulh mukâfatına namzet etip kösterdiler. "Memorial"nıñ saytında haber etilgeni kibi, tam bu deputatlar Aleksey Navalnıy ve diger Rusiye siyasiy mabüslerini destekley.
Namzetlik teklif etilgende angi uquqiy şahıs namzet etilip kösterilecegi qayd etilmedi. Beyanatta böyle yazıla: "Halqara cemaatçılığınıñ ögünde başında A.D. Saharov turğan "Memorial" yekânedir, "Halqara Memorial" ve aq qoruyıcı merkez "Memorial" - onıñ qısımları".
Dekabrniñ 28-nde, Rusiyeniñ Yuqarı mahkemesi "Memorial" halqarna cemiyetini qapatmağa qararına keldi. Baş Prokuratura teşkilâtnıñ muntazam olaraq çetel agentler aqqında qanunını bozğanında israr etti. Yekün oturışta müessiseniñ temsilcisi, teşkilât "ŞSCB-ni terrorcı devlet kibi köstergenini, natsist cinayetçilerni aqlay ve reabilitatsiya ete", dep bildirdi.
Dekabrniñ 29-nda ise Moskva prokuraturasınıñ Rusiye Adliye nazirliginiñ qararınen "çetel agent" olaraq tanılğan "Memorial" aq qoruyıcı merkezini qapatmaq talabını qanaatlendirdi. Prokuratura, "Memorial" qoruyıcı merkezini "çetel agentleri" qanunınıñ "sert ve sistematik" bozuluvları sebebinden qapatmağa talap etti. "Memorial" aq qoruyıcı merkezi öz faaliyetinde Qırımda yüz bergen vaqialarğa buyuq diqqat bere edi.
Rusiyede "Halqara Memorial"nıñ qapatılmasını Avropa Şurasınıñ baş kâtibi Mariya Peyçinoviç-Büriç, ABD-niñ Rusiyedeki elçisi Jo Sallivan, Şarqiy Avropa ve Merkeziy Asiyada Amnesty International müdiri Mari Strazers takbih ettiler.
"QırımSOS" cemaat teşkilâtı bir sıra diger uquq qoruyıcı teşkilâtlarnen birlikte dünya toplulığını "Halqara Memorial" ve uquq qoruyıcı "Memorial"nıñ qapatılmasına alâqası olğanlarğa sanktsiyalar qoymağa çağırdı. Muvafıq arizanıVatandaş azatlıqları merkezi, ZMINA insan aqları merkezi, "Diya" uquq qoruyıdı merkez, Kreml siyasiy mabüsleriniñ tuvğanlarınıñ birleşmesi, "Almenda" Vatandaş maarif merkezi, Siyasiy mabüslerniñ azat etüv platforması imzaladılar.
"Memorial"nıñ destegine Change.org-daki istidaname 139 biñden ziyade imza topladı. Rusiye İlimler akademiyasınıñ 62 akademigi ve aza mühbiri, 300-den ziyade Rusiye ve çetel medeniyet erbabı, şu cümleden aktör ve yazıcı Stiven Fray ve dramaturg Tom Stoppard "Memorial"nıñ taqip etilmesine qarşı açıq mektüp yazdılar. Nobel sulh mukâfatınıñ laureatları Mihail Gorbaçov ve Dmitriy Muratov prokuraturanı iddialarından red etmege çağırdı, yazıcı Lüdmila Petruşevskaya ise Devlet mukâfatınıñ laureatı unvanından red etti.
