Rusiyeniñ Bölge arbiy mahkemesinde Amet Suleymanovnıñ davası ile bağlı üçünci Bağçasaray «Hizb ut-Tahrir» davasınıñ mabüslerinde keçirilgen tintüvde iştirak etken eki şaat sorğuğa çekildi. Olar adliyeciniñ tahqiqat areketlerinde iştirak etmegenini bildirdiler, dep haber etti «Qırım birdemligi».
Advokat Nazim Şeyhmambetov sorğu vaqtında şaatlar tintüvniñ bir sıra allarını tasdıqlağanlarını añlattı, olardan biri, tahqiqat tedbirleri vaqtında adliyeci olmağanı, bu ise Rusiye Ceza usul qanunnamesiniñ 46 maddesiniñ 4.3 qısmını boza.
Prokuror ayrıca yazılı delillerni araştırdı, mudafaa tarafı mahkemeniñ diqqatını olarnıñ araştırılması Rusiye Ceza usul qanunnamesiniñ 285-nci maddesine zıt olaraq yapılğanını bildirdi. Mudafaa tarafı bu delillerniñ qullanılmamasını istey, çünki evelden olar yoq edi ve bir çoq ziddiyetke saipler ve tam olaraq degil, tek qısımlarnen taqdim etilgenler.
Bundan ğayrı haber etilgeni kibi, Rustem Suleymanovnıñ SİZO-da körme qabiliyeti zayıflaşqan, o tibbiyet bölügine muracaat etken, amma oña red etkenler.
Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki «Hizb ut-Tahrir davasınıñ» mabüsi, «Qırım birdemligi» cemaat birleşmesiniñ vatandaş jurnalisti Amet Suleymanovnıñ apis müddetini eki ayğauzattı.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
