Rusiye Çeçenistannıñ advokatlar palatası advokatlar Lilâ Gemeci, Rustem Kâmilev ve Nazim Şeyhmambetovnı zenaat statusından marum etti. Bunıñ aqqında Çeçenistanda advokatlar reyestrinden malüm oldı.
Advokat Nazim Şeyhmambetov "Qırım birdemligi" cemaat birleşmesine Çeçenistan Cumhuriyetiniñ Adliye nazirliginiñ idaresi Advokatalr palatasından Şeyhmambetov, Kâmilev ve Gemeciniñ advokat statusını toqtatılmasını talap etkenini aytıp berdi.
Şeyhmambetovnıñ bildirgenine köre, Rusiye qanunları "işni devam etmege imkân bere" eken.
"Amma cinayet davalarğa kelgende sıñırlavlar bar. Amma biz Qırımda insanlarnı imaye etmege devam etecekmiz", - dedi o.
O qayd etti ki, statusnıñ toqtatıluvı em kendi, em zenaatdaşları içün beklenmegen şeydir, çünki olar evelden bunıñ aqqında haberdar etilmegenler ve itiraz bildirmek içün keregi kibi azırlanıp olamağanlar. Şimdi advoktalar şikâyetler azırlaylar.
Qırımda mayısnıñ 26-ndan başlap dört qırımlı advokat tutuldı. Başta advokat Edem Semedlâyev tutuldı, onı Facebook qullanıcısı tarafından Rusiye Federatsiyası ordusınıñ Ukrainada yapqanlarına dair paylaşuvda qayd etilgeni içün Rusiye ordusını «itibardan tüşürgeninde» qabaatladılar.
Mayısnıñ 27-nde Rusiye kontrolindeki Aqmescitniñ Merkeziy rayon mahkemesi qırımlı advokat Nazim Şeyhmambetovnı sekiz künge idariy apiske aldı. Şeyhmambetovnı qorumaq içün mahkemege kelgen advokatlar Ayder Azamatov ve Emine Avamileva da Rusiye uquq qoruyıcıları tarafından tutuldı.
Mayısnıñ 29-nda Rusiye kontrolindeki mahkeme advokat Emine Avamilevanı beş künge apiske aldı. 8 künge apiske alınğan Ayder Azamatov kibi o da 2021 senesi oktâbrniñ 25-nde zenaatdaşları Edem Semedlâyevni polis bölüginiñ binası ögünde qoruğanda cemaat nizamını bozğan (İdariy uquq bozuvları kodeksiniñ 20.2.2 maddesiniñ 1-inci qısmı) vatandaşlarnıñ cemaat yerlerinde aynı vaqıtta kütleviy bulunğanını teşkil etkeninde qabaatlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
