Qomşu Rusiyede mahkeme içtimaiy ağlarda terrorizmge çağırğanında qabaatlanğan 26 yaşında Qırım sakinini apiske almağa qarar berdi, dep haber ete Krasnodar ülkesi ve Hakasiya Cumhuriyetindeki Rusiye Tahqiqat komitetiniñ matbuat hızmeti.
Tahqiqat versiyasına köre, daa evel Krasnoyarskta yaşağan er adamı içtimaiy ağdaki saifesinde «terror faaliyetini kerçekleştirmege» çağırğan metin ve resimlerni paylaşqan edi.
«2020 senesi oktâbr ayında qabaatlanğan kişi tanışına mesac yazıp, onı Rusiye Federatsiyasında yasaqlanğan «İslâm devleti» terror teşkilâtınıñ faaliyetinde iştirak etmesine çağırğan edi», – dep aytıla haberde.
Şimdi erkek Rusiye Ceza kodeksiniñ 205.2 maddesiniñ 2-nci qısmına istinaden (haber-telekommunikatsion ağlarında, hususan «İnternet» ağında terror faaliyetini kerçekleştirmege çağıruv, terror aqlavı ya da terror propagandası) ve Rusiye Ceza kodeksiniñ 205.1 maddesiniñ 1.1 qısmına istinaden (terror faaliyetine yardım etüv) qabaatlana.
Qabaatlanğannıñ adı ve soyadı aydınlatılmay, izaatları yoq.
Oktâbr ayında Rusiyede er adamı «İslâm devletini» Qırımdan maliye etkeni içün 13 yılğa koloniyağa yollanıldı.
Martnıñ 20-nde Rusiye FSBsi Qırımda «İslâm devletiniñ» «gizli bölüginiñ» faaliyetini toqtattı, dep bildirgen edi. Rusiye müessisesiniñ malümatına köre, bu taqımlarnıñ Komi ve Rostov vilâyetindeki faaliyeti toqtatıldı.
