"Qırım musulmanları davası" boyunca Rusiye mahkemesi tarafından 16 yıl ve 6 ayğa mahküm etilgen qırımlı Teymur Abdullayev ağrı ve qulağındaki iltihaptan şikâyet etmege devam ete, aynı zamanda onı Rusiyeniñ Başqırtistannıñ Salavat cezahanesinde sert tutuv şaraitlerinde tutmağa devam eteler. Bu aqta Qırım birdemligi cemaat birleşmesi onıñ ömür arqadaşı Alime Abdullayevağa atıf etip bildire.
Onıñ aytqanına köre, Teymur Abdullayev eki kere keskin nefes virus yuqunçına oğradı, bu da qulaqlarında ağırlaşuv ve ağrığa ketirdi. Qırımlı, bir müddetke bile eşitme qabiliyetini coydı, dep ayttı. SİZO-daki qomşusı onıñnen tamçınen içilgen ilâcnı paylaştı, amma ağrıları tek bir müddetke keçti.
Alime emin ki, aqayınıñ sağlığına ceza izolâtorında ve sert şaraitli kamerada çoq yıl devamında tutulması menfiy tesir etti — Abdullayevni aşqazan, qaraciger, tişlerde muntazam ağrılar raatsızlay.
Bundan ğayrı, Abdullayevni gipertoniya ve baş ağrısı raatsızlay. Onıñ aqayı, bunıñ neticesinde onıñ körüvi bozula, dep tüşüne.
"Uralda ava vaziyeti pek tez deñişe — keskin sıçramalar, iklim deñişmesi gipertoniklerge pek tesir ete. Azatlıqta o közlük aqqında bilmey edi, şimdi ise onsuz yaşap olamay", — dep ayttı Alime Abdullayeva.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
