Link açıqlığı

Saatnıñ esas haberi

Rusiyede Qırım işğaliniñ yıllığında qırımtatarlarğa qoltutuv aktsiyaları keçirildi


Moskvadaki bir kişilik aktsiyalarından biri, 2019 senesi martnıñ 17-i
Moskvadaki bir kişilik aktsiyalarından biri, 2019 senesi martnıñ 17-i

Rusiye faalleri rusiyelilerge Qırım işğali kününi hatırlatmaq içün qırımtatarlarğa qoltutuv bir kişilik aktsiyalarını keçirdi.

Yazuvlı şiarlar, rey berüv qutusı, Ukraina ve qırımtatar bayraqları olğan aktsiyalar martnıñ 18-nde Moskva ve Sankt-Peterburgda ötkerildi. Bir qaç iştirakçisi tutuldı.

Faaller Rusiyeniñ paytahtında «I am Crimean Tatar» yazuvlı şiarını kösterdi.

«Bu yazuvlı şiar qırımtatarlarnı qorçalamaq içün keçirgen birinci aktsiyalarımızdan, işğal başlağanında berli qaldı, Qırımda Rusiyeni istemegen vatandaşlar – tamır halq – taqip etilgenini añladıq. Stalin ananeleriniñ mında devam etecegi belli olğan edi. 2014 senesi Solovetskiy taşına bir qaç kere çıqıp, bizni de qırımtatarı sayıñız, dep talap etken edik. 2014 senesi baarde Qırımda başlağan repressiya ve cinayetlerni toqtatmağa talap etemiz», – dep tarif etti Qırım.Aqiqatqa Moskvadaki aktsiyanıñ iştirakçisi Vera Lavreşina.

Aktsiya iştirakçileri qırımlı siyasiy mabüslerniñ taqdirleri aqqında yazuvlı şiarlarnıñ metinlerinen de hatırlattı.

Sankt-Peterburgdaki Nevskiy caddesinde faaller «Qırım siziñmi?» sualinen rey berüv oyunını keçirdi.

«Rey berüv neticeleri: «ebet» – 103 rey; «yoq» – 96. Eki bülleten bozuldı. Tesadufen keçkenlerniñ bergen cevapları bile «Qırımnıñ fikir birligi» aqqında laf da olmağanını köstere. Cemiyet aman-aman ekige bölündi, Qırımnıñ olarğa ait olğanını tüşüngenler biraz ziyade», – dep tarif etti «sorav» neticeleri aqqında rusiyeli faali Vladimir Şipitsın.

Azatlıq Radiosınıñ bildirgenine köre, aktsiya iştirakçisi Asan Mumci soqaqta oyun rey berüv qutusını qoyğanı içün tutıp alındı. Faal topraq damartısınıñ izinsiz alğanında qabaatlandı.

Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.

Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.

XS
SM
MD
LG