Rusiyede aprelniñ 30-ınıñ gecesinden “tek bilet”nen ilhaq etilgen Qırımğa avtobus ziyaretleri başlandı. Bu aqta Rusiye “Tek naqliyat direktsiyası”nıñ matbuat hızmeti bildirmekte.
Bildirüvge köre, Krasnodar ve Anapanıñ demiryol vokzallarından ve Anapanıñ halqara ava limanından Qırımğa “tek bilet”nen yürüşler başlandı.
Daa evel, Rusiye naqliyat Nazirligi, 2019 senesi “tek bilet”nen ilhaq etilgen Qırımğa 360 biñ turist kelecek, dep tahmin etti.
Qayd etile ki, “tek bilet”nen yarımadağa kezinti demiryol, maşna ve ava naqliyatını közde tuta. Rusiyeden Qırımğa “yekâne biletlerniñ satıluvı 2019 senesi yanvar 30-ında başlandı.
Turist mevsiminde Rusiyeden “tek bilet”nen Qırımnıñ yedi şeerine kelmek mümkün: Aqmescit, Aqyar, Keriç, Kefe, Sudaq, Kezlev ve Yalta. Qomşu Rusiyeden ilhaq etilgen Qırımğa “tek bilet”nen raatlanıyıcı yürgüzmeleri 2014 senesi mayıs 1-inde başlandı.
