Oktâbrniñ 1-nde Rostov-na-Donu Cenübiy okrugınıñ arbiy mahkemesinde Ukraina tarafdarı qırımlı faal Oleg Prıhodkonıñ davası boyunca daa bir oturışuv olacaq edi, amma başlağanınen başqa künge qaldırıldı. Apiske alınğan qırımlı apishane hadimleri oña tuvğanları ketirgen ilâclarnı bermese, «damarlarnı yarar», dep bildirdi.
Bu aqta faalleri mahkemede olğan «Qırım birdemligi» cemaat birleşmesi haber ete.
Olarnıñ malümatına köre, Rostov mahkemesine advokat Nazim Şeyhmambetovnen beraber Qırımdan Oleg Prıhodkonıñ ömür arqadaşı ve qızı kelgenler. Qadı mahkeme esnasınıñ başlanğıçını onı başqa künge qaldırmaq teklifinen seslendirdi, çünki prokuror tatilde buluna.
Mahküm Prıhodko qadıdan qızınıñ tahqiqat izolâtorına yollağan ilâclarınıñ oña berilüvi aqqında soradı.
«Maña ait şeylerni bermege talap etem! Bütün şikâyetlerim advokatlarım üzerinden Avropa mahkemesine ketecek! Bir afta içinde ilâclarım berilmese, damarlarımnı yararım, söz berem!», – dep ayttı Prıhodko. Qadı, «bu mahkemege ait bir vazife degil», dep cevap berdi.
Prıhodko, tutuv şaraitleri fenalaştı, dep şikâyet etti. Qırımlınıñ aytqanına köre, onı kiçik kamerağa avuştırğanlar.
Nevbetteki mahkeme oturışuvı oktâbrniñ 15-ne belgilendi.
Sentâbr ayında Nazim Şeyhmambetov mahküm Oleg Prıhodkoğa tahqiqat izolâtorına ilâclar berilsin, dep rica etken edi.
Mahkeme muracaatını qanaatlendirdi. Rostov vilâyetindeki Rusiye Cezalarnı yerine ketirüv federal hızmeti mahkeme qararını izaatlamadı.
Rostov-na-Donu Rusiye mahkemesi sentâbrniñ 7-nde Prıhodkonıñ apis müddetini üç ayğa uzattı. Advokat Nazim Şeyhmambetovnıñ bildirgenine köre, «ciddiy bir şey olmasa», «Oleg Prıhodko davası» boyunca üküm bir ay içinde çıqarılacaq.
Aprelniñ 7-nde belli olğanına köre, Prıhodko Rostov-na-Donu SİZOsına ketirildi.
Yanvarniñ 16-nda berilgen malümatqa köre, Prıhodko «patlayıcı maddelerni ve tertibatnı qanunsız aluv, berüv, satuv, saqlav ve taşuvda» qabaatlandı. Prıhodko daa bir şeyde qabaatlandı – Lvivdeki Rusiye baş konsullığınıñ binasında patlav azırlağanında.
Oleg Prıhodko 2019 senesi oktâbrniñ 10-nda tutuldı. Rusiye FSBsi onı terror ücümini azırlağanında ve patlayıcı maddelerni qanunsız yapqanında qabaatladı.
Qırım Muhtar Cumhuriyetiniñ prokuraturası Qırımda faalniñ apiske alınğanı sebebinden Ukraina Ceza kodeksiniñ 146-ncı maddesiniñ 1-inci qısmına istinaden (azatlıqtan qanunsız şekilde marum etüv) cinaiy tahqiqat başlattı.
Advokat Nazim Şeihmambetovnıñ malümatına köre, Prıhodko Aqmescit SİZOsınıñ mahsus blokunda tutula.
Bundan evel Prıhodko memuriy dava boyunca işğal etilgen Qırımda mesüliyetke çekildi.
Kreml kontrolindeki Qırımnıñ Saq rayon mahkemesi iyünniñ 25-nde qırımlığan 2 biñ ruble para cezasını berdi. Mahkeme onı Rusiye memuriy cinayetler kodeksiniñ 20.3 maddesiniñ birinci qısmına istinaden qabaatlı dep tanıdı. Qırım.Aqiqatnıñ elinde olğan mahkeme qararına köre, faalniñ evinde tintüv vaqtında tutıp alınğan eşya ve vesiqalarnıñ «tedqiqatı» «Prıhodko üçünci şahıslarnıñ bu eşya ve vesiqalarğa irişmesi vastasınen natsist timsallerini propaganda etkenini ve köstergenini» işaretlemekteN
Faalniñ özü evindeki bütün timsaller «antika», dava malümatında olğan svastikalı kölmek ise «suvenir» ve 2010 berli onda olmağanını ayttı.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.
