Rusiyede Perm cermay zavodı bütünley işlevini toqtattı. Bu, Quralaynıñ 7-nde Ukrayin uçucısız uçaqnıñ ücüminden soñ oldı, bunıñ neticesinde yanğın çıqtı ve tehnika zarar kördi, dep bildire Reuters agentligi.
Agentlikniñ menbaları bildirdi ki, darbe neticesinde üç birinci neft çıqarıcı qurulışı acele toqtatıldı ve bazı ekinci qurulışlar toqtatıldı.
Menbalarnıñ malümatına köre, tamir işleri bir qaç afta süre bile. "Lukoil" şirketi, neft zavodınıñ saibi izaat bermek istemedi.
Yerli gubernator Dmitriy Mahonin Quralaynıñ 8-nde bildirdi ki, Ukrayin uçucısız uçaqları Moskva şarqından tahminen 1460 kilometr uzaqlığında Perm vilâyetinde sanayı obyektlerine ücüm etti. O, obyektniñ adını aytmadı.
Quralaynıñ 7-nde Ukrayina Silâlı quvetleriniñ Baş ştabı Rusiye Federatsiyasınıñ Perm ülkesinde "LUKoyl" neft zavodınıñ daa bir zarar körgenini tasdıqladı.
Ukrayinağa qarşı Rusiyeniñ keñ kölemli basuvı başlanğan soñ Rusiyede ve o, işğal etken topraqlarda çeşit obyektler ava ücümlerine oğray. Eñ sıq 2024 ve 2025 seneleri ücüm sebebi cermay zavodları ola. Ukrayinanıñ işğal altındaki topraqlarında da Rusiye obyektleri ücümlerge oğray.
Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğal ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.