Sota muarririyetinde bildirdiler ki, olar blok etilgeni aqqında bir de bir haber almağanlar. "Añlaşıla ki, qarar martnıñ 5-nde "Rusiye Federatsiyası qanunlarınıñ muntazam bozuluvı" sebebinden qabul etildi. Yani, tsenzuranı bozğanımız içün. Biz bloklarğa azır edik ve şimdi maqalelerni eki variantta teklif etecekmiz: VPN ile ve onsuz, zenaatdaşlarımız kibi", - denile beyanatta.
"Memorial"nıñ malümatına köre, saytnıñ blok etilmesi aqqında malümat "Roskomsvoboda"nıñ yasaq etilgen saytlar cedvelinde peyda oldı. Saytnıñ qapatılmasını talap etken müessise belli degil.
Rusiyede saytlarnıñ kütleviy şekilde blok etilüvi Ukrayinağa istilâdan soñ başlandı. Fevralniñ 24-nde Roskomnadzor matbuat vastalarından Ukrayina ile cenk aqqında yalıñız "resmiy Rusiye menbalarından alınğan malümat"nı derc etmege talap etip, para cezaları ve bloklav ile qorquzğan edi. Nazirlik matbuat vastalarından Rusiye akimiyeti "kerçekke uymağan" dep sayğan cenk aqqında malümatnı silmege talap ete. Neticede Rusiyede yüz biñlernen sayt ve bağlantılar, Facebook, Instagram ve Twitter içtimaiy ağları, em de mustaqil kütleviy haber vastalarınıñ saytları blok etildi, şu cümleden "Nastoyaşçeye Vremâ" ve "Radio Svoboda".
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
