Link açıqlığı

Saatnıñ esas haberi

Rusiyede maküm etilgen qırımtatar Appaz Kurtamet tuvğanlarına telefon etmege izin aldı


Tasviriy resim
Tasviriy resim

Rusiye makemesi tarafından maküm etilgen qırımtatar Appaz Kurtamet telefon etmege ve yaqınları ile qonuşmağa izin aldı. Bu aqta qırımtatar resurs merkezine onıñ anası Ayşe Kurtamet bildirdi.

"Şimdi video vastasınen telefon ete bile, o, Rusiye nomeri er keske doğrudan telefon ete bile. Limit — künde 15 daqqa, bazıda eki kere 15-şer daqqa", — dep qayd etti Ayşe Kurtamet.

Onıñ aytqanına köre, Appaz karantinden çıqtı ve şimdi Rusiyeniñ Pskov vilâyetiniñ Sebej rayonındaki Sosnovıy Bor qasabasındaki cezahanede buluna.

Qayd etilgenine köre, cezahanede oquş imkânı bar, amma siyasiy madde sebebinden Appazağa programmalaştıruv saasındaki tasil almaq yasaqtır.

Bundan da ğayrı, o, aylıqlı işke kirdi, amma anda ayda 1000 ruble qazanacaq, bu ise mecburiy emek sayıla.

"Appaz anda işke kirdi, ayda 1000 ruble töleyler, aslında bu bedava iş. Şimdi öz-özüni inkişaf ettirmek içün daa az vaqıt bar —kitap oqumaq ve ingliz tilini ögrenmek tek raatlıq künleri, afta soñunda mümkün", — dep qayd etti onıñ anası.

Appaz, cezahanedeki şarait evelki apishanelerge köre daa yahşı olğanını ayttı. "Vladimir merkezi müstemleke ile qıyaslanğanda — yer ve kök kibi", — dep qayd etti Ayşe Kurtamet.

Appaznıñ anasınıñ aytqanı kibi, Pskov vilâyetindeki cezahanede temiz avada bulunmaq mümkün, Vladimirde ise aftada bir kere duş ola edi, aş pek yaramay edi, atta kenefke konvoy ile ketire ediler. Aynı zamanda o qayd ete ki, o şarait bile Qırım SİZO-sında bulunmaqtan daa yahşı edi.

"2,5 yıl devam etken ağır yolnı keçken soñ, tek şimdi biraz qolaylaştı — eñ azından qonuşmaq, tuvğanlarnıñ sesini eşitmek ve atta video bağı vastasınen körüşmek imkânı bar ", — dep qayd etti siyasiy mabüsniñ anası.

2023 senesi aprelniñ 20-nde Rusiye qurğan Aqmescitniñ Kiyev rayon mahkemesi 2022 senesi iyul ayında Herson vilâyetindeki memuriy sıñırda hırsızlanğan qırımtatarı Appaz Kurtametni "Qırım" göñülli batalyonına maddiy yardım köstergen iddiası ile 7 yıl apis cezasına mahküm etti.

2023 senesi avgustnıñ 29-nda Rusiye kontrolindeki Qırım Yuqarı mahkemesi Appaz Kurtametniñ ükmüni deñiştirmedi.

Qırımtatar faali Elmaz Qırımlınıñ Facebookta yazğanına köre, Rusiye tahqiqatınıñ versiyasına köre, Kurtamet daa soñra bilgenine köre, "Qırım" batalyonında hızmet etken bir dostuna 500 ğrıvnâ bergen.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG