17 yılğa maküm etilgen qırımlı Timur Yalkabov Rusiyeniñ Ulyanovsk vilâyetindeki Dimitrovgrad şeeriniñ 1-nci apishanesinden Murmanskqa etap etilgen. Bu aqta "Qırım birdemligi"ne ömür arqadaşı Aliye Yalkabova bildirdi.
Cezahane Qırımdan 3,5 biñ kilometr uzaqlıqta buluna.
"O yerdeki ava şaraiti bizimkiden pek farqlana, ve men onıñ iklimni nasıl keçireceginden qasevetlenem, çünki astması bar. O yerge barmaq pek qıyın olacaq: anda doğru yol yoq, beş balanen fizikiy ve maliye ceetten pek qıyın", — dedi Aliye Yalkabova.
2022 senesi saban ayınıñ soñunda Rostov-na-Donu şeeriniñ Cenübiy okrug mahkemesi qırımtatar faalleri Timur Yalkabov ve Lenur Seydametovnı "Qırımda terroristik faaliyet teşkil etüvde ve iştirak etüvde" qabaatlap, uzun müddetke azatlıqtan marum etti.
2021 senesi kiçik aynıñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi ilk küz ayınıñ 9-nda Rostov-na-Donu Cenübiy okrugınıñ arbiy mahkemesi Yaşar Şihametovnı terrorizmde qabaatlap, 11 yılğa azatlıqtan marum etti.
Aq qorçalayıcılarnıñ fikirince, teşkilât azalarını ükümet devrimini azırlav ve terrorizm içün degil, firqa tarafdarlarınıñ Qırımda siyasiy repressiyalarğa qarşı cemaat aktsiyaları, Rusiye akimiyetini tenqit etkenleri ve qırımtatarlar 2014 senesi işğalge qarşı çıqqanları içün taqip eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
