Mesutov hastahanege saban ayınıñ 11-nde avuştırıldı. 2024 senesi noyabr ayında erkekni Yakutsknıñ 1-inci izolâtorına etap etken soñ, onı aman-aman SİZO-dan çıqarmadılar, dep bildirdi tuvğanları.
Cezalar Mesutovnıñ masada yuquğa ketkeni, saatnı diger mabüslerden sorağanda bağırğanı içün tayin etilgen. SİZO-dan soñ qırımtatarnı ŞİZO-ğa ve SİZO-ğa yerleştirdiler. O vaqıt apishaneniñ tükânından tek bir kere aş alıp olğan edi.
Azatlıqta musulmannıñ sağlıq problemleri bar edi. Hususan, omurğa ile bağlı. Tuvğanlarınıñ aytqanına köre, o, aftalarca evinde yatıp turğan, qorantası musulmanğa ineler urğan. Lipetsk apishanesinde, cezahanege ketmezden evel, ekimler oña hronik gepatit TS diagnozını qoydılar.
"ŞİZO-da o, esini coymağa başladı, yüregi tutıp başladı. Onı hastahanege yerleştirmekni vade ettiler, amma öyle de olmadı. Soñra ise, onıñ omurgası ile bağlı problemler kerginleşkeni aqqında mektüp aldıq", — dep aytıp berdiler Mesutovnıñ qız qardaşları.
Hastahanede qırımtatarnı 21 kün tutmaqnı vade ettiler. Tuvğanlarınıñ aytqanına köre, onı anda yürek problemleri, arterial gipertentsiyası ve sıq-sıq bayılıp ketkeni içün alıp kettiler. 1-nci tüzetüv cezahanesinde ondan daa talil içün qan aldılar, amma ne içün olğanını aytmadılar. Mesutov qan alınmasını red etken soñ, oña daa 15 kün ŞİZO tayin etildi, dep qoşa tuvğanları.
Ruslan Mesutovnıñ omurgasında ağrıları olğan diagnoz, oña ve qorantasına Rusiye apishanesinde daa aytılmağan edi. O alâ daa belli degil. Bunıñnen beraber, ekimler qorantağa mahsus korset yollamağa izin bergenler.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
