15 yılğa maküm etilgen qırımlı faal Asan Ahtemovnı Rusiyeniñ "Vladimirskiy tsentral" apishanesinden etap ettiler. Bunı onıñ qadını Repika Ahtemova bildirdi.
Ahtemov fevralniñ 17-nde telefon etip, onı Nizhniy Novgorod şeerindeki 5-inci tüzetüv koloniyasına alıp ketkenlerini bildirdi.
"O, bu müessisede ne qadar qalacaq belli degil. Bundan soñ qayda alıp ketecekleri aqqında da malümat yoq. Sağlıq vaziyeti sebebinden bir yıldan ziyade buğumları, ayaqları ve qolları raatsızlay. Suvuq olğan sayın, bu mesele onı daa çoq raatsızlay. O, kerekli tibbiy yardımnı almadı", — dep bildirdi o.
"Tribunal. Krımskiy epizod" resursınıñ malümatına köre. Ahtemov yanvar ayından berli etapnı bekley edi, çünki apishanede ceza çekme müddeti endi bitken edi, qalğan müddetini sert rejimli koloniyada keçirmek kerek.
Rusiye Asan Ahtemovnı bir gruppa tarafından yapılğan ve büyük zarar ketirgen diversiya, em de teşkil etilgen gruppa tarafından yapılğan patlayıcı aletlerniñ qanunsız satın aluvı, saqlavı, satıluvı ve kontrabandasında qabaatladı.
2022 senesi Ahtemov 15 yıl sert rejimli koloniyada qalmasına üküm etildi, 500 biñ ruble para cezası ve 1 yıl azatlıqtan marum etilmesine üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
