15 yıl apis cezasına maküm etilgen qırımlı faal Asan Ahtemovnı Rusiyeniñ Arhangelsk vilâyetinde 5-nci tüzetüv koloniyasına, Korâjma şeerine etap ettiler. Şimdi Qırım sakini karantinde buluna, dep bildirdi onıñ apayı Repika Ahtemova.
"Bugün, 2025 senesi saban ayınıñ 10-nda, Asan Zonatelekom servisi vastasıne telefon etip, onı Arhangelsk vilâyetiniñ 5-nci tüzetüv koloniyasına ketirgenlerini bildirdi. Şimdi o, karantinde, bir özü otura. Onıñ aytqanına köre, etap ağır edi, yolda hastalandı. Onıñ aqqında sorağan ve onıñ içün qasevetlengen er keske selâm aytmaqnı rica etti", — dep yazdı o.
"Tribunal. Krımskiy epizod" resursınıñ malümatına köre, Ahtemov yanvar ayından berli etapnı bekley edi, çünki apis cezasını endi çekken edi ve qalğan müddetini sert rejimli koloniyada keçirmek kerek.
Rusiye Asan Ahtemovnı bir gruppa tarafından yapılğan ve büyük zarar ketirgen diversiya, em de teşkil etilgen gruppa tarafından yapılğan patlayıcı aletlerniñ qanunsız satın aluvı, saqlavı, satıluvı ve kontrabandasında qabaatladı.
2022 senesi Ahtemov 15 yıl sert rejimli koloniyada qalmasına üküm etildi, 500 biñ ruble para cezası ve 1 yıl azatlıqtan marum etilmesine üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
