Musulmannıñ qız qardaşı Svetlana Ablâmitovanıñ aytqanına köre, o vaqıttan berli qorantası onıñ bulunğan yerini bilmey. Onıñ aytqanına köre, qardaşınen soñki sefer dekabrniñ başında bağlanğan edi. Gaziyev Zonetelekom vastasınen telefon etip, onı "er angi vaqıtta apishaneden cezahanege çıqara bileceklerini" bildirgen.
"Yolda kerekli şeyler alıp olması içün onıñ esabına para yolladım. Dekabrniñ 19-nda oña mektüp yazıp, paranı aldımı yoqmı dep soradım, amma cevap kelmedi", — dep tarif etti Svetlana Ablâmitova.
O, qardaşına tekrar yazmaq qıyın olğanını tüşüngenini bildirdi: 2021 senesi psihiatrik hastahanede keçken insult ve köteklenüv sebebinden qırımlınıñ sağ qolu ağırğan edi.
"Amma mektüpler yoq edi ve yoq edi. Yanvar ayında oña tekrar yazdım, yanvarniñ 9-nda mektüp yolladım. Men bellesem, bayram tatilleri sebebinden mektüpler toqtatılğan edi. Yanvarniñ 16-na qadar bekledim, amma mektüpler kene kelmedi. Soñra apishanege telefon ettim, ve olar maña böyle mabüs yoq, dep ayttılar. Ne vaqıt ve qayda yollanılğanını aytmadılar", — dep qoştı Ablâmitova.
Yanvarniñ 28-nde qadın Rusiyeniñ Cezalarnı yerine ketirüv federal hızmetine ve Vladimir vilâyeti boyunca FSİN idaresine muracaat etip, ağır hasta Servet Gaziyevniñ ne yerge etap etilgenini bildirmege talap etti.
"Bir aydan berli onıñ bulunğan yerini bilmeyim, ondan haberim yoq", — dep qayd etti siyasiy mabüsniñ qardaşı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2023 senesi yanvarniñ 11-nde Servet Gaziyevni 13 yıl apis cezasına mahküm etti ve 1 yıl 6 ay müddetine areket azatlığınıñ sıñırlanması tayin etildi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.