Rusiyede uzun müddetlerge maküm etilgen qırımlılarnı Rostov-na-Donu şeeriniñ SİZOsından etap eteler. Bunı "Qırım birdemligi" cemaat birleşmesi haber ete.
Birleşmeniñ malümatına köre, Rostov SİZOsından on qırımlını etap eteler. Bu, bugün etap etilecek Vadim Siruk, İnver Bekirov, Arsen Cepparov. Başqa qırımlılarnı - Emir-Üsein Kuku, Teymur ve Üzeir Abdullayevler, Muslim Aliyev, Refat Alimiv, Enver Seytosmanov ve Nariman Memedeminovnı keçken aftanıñ soñunda etap ettiler. Kimni qayda - haber etmeyler, dep qayd ete birleşme.
Advokat Ayder Azamatovnıñ malümatına köre, o, Novoçerkassk SİZOsına etap etilecek müşterisi Arsen Cepparovnı Rostov SİZOsında ziyaret etip oldı.
"Bulunuv şaraitini soradım, Arsen baş ağrısı ve köterilgen qan basımına şikâyet etti. Üç ay evel keçirmege vade etkenleri betinde "piloma" kesüvi ameliyatını alâ daa yapmadılar", - haber etti Azamatov.
Bundan ğayrı Cepparov, SİZOda tibbiy yardım asıl etilmegenini ayttı.
Qırımlılarnıñ etapı aqqında başqa menbaalarda tasdıqı yoq.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
