Front Line Defenders teşkilâtınıñ müdiri Oliviya Mur Rusiye Baş prokuraturasına qırımlı Server Mustafayevge tibbiy yardım kösterilmegeni aqqında şikâyet yolladı, bundan soñ oña yürek teşkerüvi tayin etildi. Bu aqta "Qırım birdemligi" haber ete.
Qırımtatarnıñ apayı Mayye Mustafayeva bildirgenine köre, şikâyette, Tambovnıñ №1 tüzetüv koloniyasınıñ memuriyeti uquq qoruyıcısına yardım köstermegenini qayd ete. Altı yıl evelsi apiske alınğanından berli SİZO-da ağır şaraitlerde bulunğanı içün Mustafayevniñ yürek problemleri peyda oldı.
Bundan da ğayrı, onıñ kökrek qafesiniñ astında şişe tapıldı. 2022 senesi sentâbr ayında koloniyağa kirgen soñ, Mustafayevge ameliyat teklif etildi, amma o, ameliyatnıñ nasıl şaraitlerde keçecegini añlamayıp, red etti, dep tarif etti Maye.
Olivia Mur muracaat etken soñ Serverge EKG yapıldı, amma kardiolog onı daa baqmadı.
Server Mustafayev "Qırım birdemligi" cemaat birleşmesiniñ koordinatorı. 2018 senesi tintüvlerden soñ quvetçiler Server Mustafayev ve Edem Smailovnı yaqaladılar.
2020 senesi sentâbrniñ 16-nda Rostov-na-Donu Cenübiy okrugınıñ arbiy mahkemesinde Qırım uquq qoruyıcısı 14 yılğa azatlıqtan marum etildi. Olarğa qarşı qabaatlavlar Bağçasaraydaki Hizb ut-Tahrir Davasına qoşuldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
