"Qırım musulmanları davası" boyunca mahküm etilgen qırımlı Üzeir Abdullayev ilk küz ayınıñ 5-nden başlap, Salavatnıñ 2-nci tüzetüv cezahanesiniñ ŞİZO-sında buluna. Bu aqta "Qırım birdemligi"ne onıñ qadını Güzal Suleyman-Zade bildirdi.
Onıñ sözlerine köre, aqayını ŞİZO-da aman-aman bir buçuq ay tuttılar ve ilk küz ayınıñ 20-nde çıqarmaq kerek ediler. Cezahaneniñ memuriyeti qırımtatar içün ne sebepten böyle ceza tayin etkeni qorantasına haber etilmedi.
"Sebep cezahane hadimleri ile sessizce selâmlaşqanı, ya da selâmlaşmağanı, ya da er kesnen selâmlaşmağanı ve ilâhre ola bile", — dep tüşüne Gülzal Suleyman-Zade.
Rostov-na-Donudaki Cenübiy okrugınıñ arbiy mahkemesi 2019 senesi iyün ayında Aqmescitniñ "Hizb-ut-Tahrir davasınıñ" mabüslerine üküm çıqardı. Soñra Rusiye Yuqarı Mahkemesi qırımlar içün cezanı deñiştirdi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
"Memorial" aq qorçalayıcı merkezi bu davanıñ bütün mabüslerini siyasiy mabüs dep tanıdı.
Bundan evel, martnıñ 16-nda, Ukrayina Baş prokuraturası Abdullayevniñ ceza kamerasında tutulğanı sebebinden istilâcı memleketniñ toprağında akimiyet vekilleri tarafından cenk qanunlarını ve adetlerini bozuv cinaiy dava (Ukrayina Cinaiy kodeksiniñ 438-inci maddesiniñ 1-nci qısmı) başlandı.