Rusiye tarafından mahküm etilgen Qırımlı vatandaş jurnalisti Remzi Bekirovnı aman-aman bir aydan berli Abakan şeeriniñ 33-nci tüzetüv koloniyasınıñ ceza izolâtorından (ŞİZO) çıqarmaylar. Bu aqta "Qırım birdemligi" cemaat birleşmesi mabüsniñ ömür arqadaşı Halide Bekirovağa atıf etip bildire.
Berilgen malümatqa köre, Bekirov avgustnıñ 12-nde Rusiyeniñ 33-nci koloniyasına kelgen soñ, onı karantin kamerasından beş künge ŞİZO-ğa yolladılar, soñra ise çeşit sebeplerden anda bulunma müddetini uzattılar. Olarnıñ arasında baş kiyiminiñ olmaması, FSİN hadimi ile selâmlaşmamaq ve oña öz malümatını bildirmemek, em de, mabüsniñ qadını aytqanı kibi, Bekirov gece "namaz oqumağa yatqan yerinden ayırılğanı" içün kün tertibiniñ bozuluvı.
"O, bu koloniyada bulunğan ilk qırımlı siyasiy mabüstir. Onı diqqatnen közeteler, oña maneviy basqı yapalar. Amma bütün bu kinayeler onı ŞİZO-ğa yerleştirmek içün sebep degil. Oña mektüp yazmağa, telefon etmege imkân bermeyler, onıñ içün ondan haber alamaymız", — dep tarif etti Halide Bekirova.
Apayınıñ aytqanına köre, cezahaneniñ hadimine malümat bermegeni içün Bekirovğa qarşı yañıdan protokol tizildi.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
