Şimdi o, Vladimir şeeriniñ apishanesinde buluna ve tibbiy-sanitar bölükte tayinlengen tedaviylevni ala, dep tarif etti siyasiy mabüsniñ anası Lilâ Seytumerova apishanede uzun körüşüvden soñ.
"Aş-suv qanaatlendirici. Domuz eti yoq. Bu eñ esası", — dep bildire Lil Seytumerova oğlunıü sözlerini.
Daa evel, 2023 senesi sentâbr ayında, tuvğanları bildirgenine köre, siyasiy mabüsniñ gastrit hastalığı keskinleşken soñ acele yardım çağırmağa mecbur oldı. Vladimir apishanesindeki tutuv şaraitlerine, anasınıñ aytqanına köre, faal şikâyet etmey.
2020 senesi martnıñ 11-nde Bağçasarayda qırımtatarlarnıñ bir qaç evinde tintüvler keçirildi — Amet Suleymanov, ağa-qardaş Seytumer ve Osman Seytumerovlar, olarnıñ dayısı Rustem Seytmetov. Bundan ğayrı, bir qaç yıl evelsi Qırımnı terk etmege mecbur olğan "Qırım birdemligi"niñ sabıq faali Seytumer Seytumerovnıñ evinde tintüv keçirildi.
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
«Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
