Bu aqta Bekirovnıñ apayı Halide RF Cezalarnı yerine ketirüv federal hızmetiniñ Krasnoyarsk vilâyeti boyunca baş idaresiniñ yolbaşçı muavini Yevgeniy Stepanovdan malümat aldı. Bir kün evelsi o, müessisege yazılı şekilde muracaat etti.
Bundan evel Remzi Bekirov ömür arqadaşına 2024 senesi iyülniñ 5-nde onı Krasnoyarsk vilâyetiniñ Yeniseysk şeerindeki 2-nci apishaneden etapnen çıqarmaqnı planlaştırğanlarını bildirdi.
"Yolda Krasnoyarskta bir vaqıt keçit noqtasında bulunmaq kerek edi", — dep bildirdi mabüsniñ apayı.
Halide Bekirova Yeniseyskniñ 2-nci apishanesiniñ müdiriniñ vazifelerini eda etken Yevgeniy Larinniñ adına mektüp yazıp, aqayını qaysı koloniyağa alıp ketkenlerini haber etmekni rica etti.
Aynı mektüpni Halide Bekirova Krasnoyarsk vilâyetindeki FSİN Baş idaresine yolladı.
Remzi Bekirov — vatandaş jurnalisti, "Qırım birdemliginiñ" faali. Jurnalist Qırım sakinlerine qarşı siyasiy sebeplerden açılğan davalar boyunca tintüvler ve mahkemelerniñ yayınlarını alıp bardı, şu cümleden "Veciye Kaşka" davası, arhiyepiskop Klimentniñ tutuluvı, "Hizb ut-Tahrir" ve diger davalar boyunca. Remzi Bekirov Qırım siyasiy mabüsleriniñ qorantalarına yardım etmek ğayesiniñ teşebbüsçisidir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
