Rusiye mahkemesi tarafından 11 yıl ve 6 ayğa azatlıqtan marum etilgen qırımlı Emil Cemadenovnıñ sağlığı Rusiye apishanesinde fenalaşa. Bu aqta Qırımtatar resurs merkezine onıñ ömür arqadaşı Liana Belâlova bildirdi.
Berilgen malümatqa köre, Emil Rusiye koloniyasında dört yıl devamında bayağı azdı, bunı körmek mümkün. Emilniñ sağlıqlı aşamağa tırışqanınıñ sebebi de budır. O, şekerden vazgeçti ve hronik mide ülserinden sebep, unlu mahsulatlardan mümkün olğanı qadar uzaq tura.
"Onı eñ çoq apishanede peyda olğan yarası raatsızlay. Ekimler onı baqtı ve ameliyat kerek olğanını ayttı", — dep bildirdi Belâlova.
Keçken sene yazda Cemadenov tutulğan apishaneniñ müdir muavini oña, ameliyat içün "özü razılıq arizalarını imzalamaq kerek olğanını" añlatqan edi, amma apishaneniñ hastahanesinde şaraitler yaramay, bu ise tuvğanlarınıñ qasevetini doğura.
Bundan ğayrı, Cemadenovnıñ körüvi fenalaştı, dişleri bozula, uzun vaqıt suvuqta bulunğan soñ qolunda ağrılar ola, soñ boynu da ağıra, dep qoştı Belâlova.
2016 senesi oktâbrniñ 12-nde Qırımda beş qorantada tintüvler keçirildi. Tintüvler neticesinde Rusiyede yasaq etilgen ve işğal etilgen Qırımda "Hizb ut-Tahrir" teşkilâtında iştirak etkeninde qabaatlanğan beş qırımtatar tutuldı: Rustem İsmailov, Üzeir Abdullayev, Teymur Abdullayev, Emil Cemadenov, Ayder Saledinov.
Rostov-na-Donu Cenübiy okrugınıñ arbiy mahkemesi 2019 senesi iyün ayında Aqmescit "Hizb ut-Tahrir" davasınıñ mabüslerine üküm çıqardı. Daa soñra Rusiye Yuqarı mahkemesi qırımlılarğa çıqarılğan ükümni deñiştirdi.
"Memorial" aq qorçalayıcı merkezi bu davanıñ bütün mabüslerini siyasiy mabüs olaraq tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
